Otandyq balýan qyz bir jylda eki ret Azııa chempıonatynyń qola júldesin jeńip aldy

ASTANA. KAZINFORM — Výngtaýda (Vetnam) kúres túrlerinen jastar arasynda ótip jatqan Azııa chempıonatynda qazaqstandyq Zeınep Baıanova júldege ilikti.

Batysqazaqstandyq balýan 23 jasqa deıingiler arasynda 53 kelige deıingi salmaqta qola júldeger atandy.

Qazaqstan kúres federatsııasynan málim etkenindeı, Z.Baıanova qola medal úshin básekede ózbekstandyq Dılshoda Matnazarovany aıqyn basymdylyqpen utty — 13:1.

Bul — Zeıneptiń bıylǵy Azııa birinshiligindegi ekinshi qolasy. Osyǵan deıin ol Iordanııa astanasy Ammanda eresekter arasynda ótken qurlyqtyq básekede qola júldegerler qatarynan kóringen edi. 20 jastaǵy balýannyń jeke bapkeri — Musabek Naregeev.

Eske sala keteıik, budan buryn Zeınep Baıanovanyń armany olımp shyńyn baǵyndyrý ekendigi týraly aıtqanyn jazǵan bolatynbyz.