Otandyq áýejaılar birtindep JET A-1 avıaotynyn paıdalanýǵa kóshedi
Elimizde jylyna 300 myń tonna avıaotyn tapshy. Bul týraly Úkimet otyrysynda Kólik mınıstri Marat Qarabaev aıtty, dep habarlaıdy Kazinform.
«Aldaǵy ýaqytta eldiń tranzıttik áleýetin budan ári arttyrý maqsatynda jerústi ınfraqurylymdy damyta otyryp, mynadaı 3 baǵytta jumys atqarylatyn bolady. Birinshi - avıaotynmen qamtamasyz etý. Ekinshi - arnaıy tehnıka jáne jabdyqtardy jańartý. Úshinshi - áýejaılardyń irgeles aýmaǵynda ushý qaýipsizdigin joǵarylatý. Qazirgi kezde avıaotynnyń tapshylyǵy jylyna shamamen 300 myń tonnany quraıdy. Bul kólemdi ımporttyq avıaotynnyń túrlerin kóbeıtý arqyly sheshýdi josparlap otyrmyz, onyń ishinde Qytaıdan JET A-1 markaly otyndy da qarastyrýdamyz. Osy maqsatta Almaty áýejaıynyń janarmaı quıý kesheni jańǵyrtýdan ótýde jáne 2024 jylǵy maýsymnan bastap atalǵan avıaotyn túrin paıdalanýǵa kóshedi», - dedi ol.
Mınıstrdiń aıtýynsha, otandyq zaýyttardyń óndirisin JET A-1 otyn óndirisine qaıta baǵdarlaý avıaotyn kóleminiń aıtarlyqtaı ulǵaıýyna alyp kelmeıdi. Oǵan qosa, barsha áýejaılardyń ınfraqurylymyn JET A-1 qabyldaýǵa ótkizý úshin qomaqty qarajat qajet.
«Sondyqtan, áýejaılar óz múmkindikterin eskere otyryp, ret-retimen qajettilikterine qaraı osy janarmaı markasyn paıdalanýǵa kóshetin bolady. Budan basqa, avıaotynnyń túpkilikti qunyna áser etetin deldaldyq qurylymdardy boldyrmaý maqsatynda ımporttyq avıaotyndy sheteldik munaı óńdeý zaýyttarynan tikeleı satyp alý máselesi pysyqtalýda», - dedi Marat Qarabaev.
