Otandyq áýe kompanııa eki jańa ushaqpen tolyqty
ASTANA. KAZINFORM – SCAT áýe kompanııasy Boeing 737 MAX 8 úlgisindegi eki jańa áýe kemesimen tolyqtyryldy. Áýe parkiniń artýy tasymaldaýshynyń marshrýttyq jelisin damytý jáne qoldanystaǵy ushý baǵdarlamalaryn kúsheıtýmen tikeleı baılanysty.
Atalǵan ushaqtar AQSh-tyń Sıetl q. qalasyndaǵy Boeing zaýytynan tikeleı jetkizildi. Sonymen qatar bul – áýe kompanııanyń parkine bir mezette eki borttyń birden qabyldanýy alǵash ret bolyp otyr.
2026 jyly áýe kompanııasy Shymkentten Qaraǵandy, Qostanaı, Bishkek, Novosıbırsk, Sankt-Peterbýrg jáne Tıýmen qalalaryna jańa reıster ashty, sondaı-aq Astanadan Mońǵolııa astanasy – Ulan-Bator qalasyna tikeleı reısterdi iske qosty.
Jańa Boeing 737 MAX 8 ushaqtary osy baǵyttarda paıdalanylyp, reıisterdi josparlaýda qosymsha ıkemdilikti qamtamasyz etedi jáne tasymal geografııasyn odan ári keńeıtýge múmkindik beredi.
Áýe kemeleri sondaı-aq búginde Qazaqstannyń marshrýttyq jelisiniń negizgi ósý núkteleriniń birine aınalyp kele jatqan Shymkent áýejaıy bazasyndaǵy habty damytýǵa tartylatyn bolady. Shymkentti iri avıatsııalyq torap retinde nyǵaıtý jáne ushý baǵyttaryn keńeıtý jolaýshylar úshin el ishinde de, odan tys jerlerde de jańa múmkindikter ashady.
Aıta keteıik, Taıaý Shyǵystaǵy qaqtyǵys áli jalǵasyp jatqandyqtan, Air Astana áýekompanııasy Almaty men Astanadan Dýbaıǵa ushatyn turaqty reısterdi toqtatý merzimin 1 sáýirden 30 sáýirge deıin (qosa alǵanda) uzartýǵa májbúr bolyp otyr. Bul týraly áýe kompanııasynyń baspasóz qyzmeti málim etti.
