Otandyq áýe kompanııalar jolaýshylardy BAÁ men Qatardan elge jetkizedi

ASTANA. KAZINFORM — Búgin SCAT jáne Air Astana áýe kompanııalary Dýbaı men Doha qalalarynan Almaty men Astanaǵa 6 reıs oryndaıdy, dep habarlaıdy Kólik mınıstrliginiń baspasóz qyzmeti.

Vedomstvo málimetinshe, Taıaý Shyǵysqa ushýlar áli de alty memlekettiń (Iran, Izraıl, Irak, Iordanııa, Sırııa jáne Lıvan) áýe keńistigin aınalyp ótý arqyly júzege asyrylyp jatyr.

— Máselen, Air Astana 25 maýsymnan bastap Dýbaıdan Almaty men Astanaǵa, sondaı-aq Dohadan Almatyǵa ushatyn áýe reısterin qaıta iske qosty. Búgingi kúnge deıin shegerilip kelgen reısterdiń jolaýshylaryn elge qaıtarý úshin qosymsha repatrıatsııalyq reıster de uıymdastyrylady. «SCAT» áýe kompanııasy azamattardy Katar elinen Qazaqstanǵa shyǵara bastady. «Doha-Almaty» reısi búgin Katar ýaqytymen saǵat 07:35–te oryndaldy. Bortta 213 jolaýshy boldy. Sondaı-aq, búgin «Doha-Astana» reısi oryndalady. Bort Dohadan Katardyń jergilikti ýaqytymen saǵat 14:30–da ushady dep josparlanǵan. Jolaýshylardyń sany — 290 adam, — delingen mınıstrlik habarlamasynda.

Azamattardy áketýge arnalǵan kelesi josparlanǵan charterlik reıster:

27.06.25 Doha-Astana
29.06.25 Doha-Almaty

Budan buryn Qazaqstan áýe kompanııasy 25 maýsymnan bastap Taıaý Shyǵysqa qaıta ushatynyn jazǵanbyz.