Otandyq ádebıettiń 100 tanymal kitabyn anyqtaıtyn saýalnama jalǵasyp jatyr
ALMATY. KAZINFORM – Almatyda otandyq ádebıettiń tanymal 100 kitabyn anyqtaý jobasyna qatysýshylar marapattaldy.
Ulttyq quryltaı músheleriniń bastamasymen elimizde otandyq kórkem ádebıettegi eń tanymal 100 kitapty anyqtaýǵa baǵyttalǵan jalpyhalyqtyq saýalnama júrgizilip jatyr.
Jobanyń maqsaty – qoǵamdy kitap oqýǵa úndeý, ádebı murany dáripteý, túrli býyn ókilderiniń kitapqa degen talǵamyn zerdelep, ádebı qundylyqtar júıesin saralaý.
Qatysýshylar kórkem ádebıettiń túrli janryndaǵy ózderi úzdik dep tapqan 10 kitapty usyna alady. Búginge deıin saýalnamaǵa 20 myńǵa jýyq oqyrman qatysyp, óz tańdaýyn jasaǵan.
— Saýalnamaǵa oqyrmandar belsendi atsalysyp jatyr. Oǵan qatysqysy keletin azamattar eGovMobile qoldanbasy arqyly súıikti shyǵarmalaryn usyna alady. Bul ádebıet pen rýhanııattyń tyǵyz baılanysty ekenin taǵy bir dáleldep otyr. Qazaq halqynyń ádebıetke degen kózqarasy eshqashan ózgermeıdi. Jazýshylar jaqsy damyp jatyr. Memleket tarapynan da qoldaý mol, - dep atap ótti Ulttyq quryltaı múshesi Raısa Qadyr.
Sarapshy Aslan Tilegenniń aıtýynsha, qazaqtyń aýyzsha jáne jazba ádebıeti 100 kitappen shektelmeıdi.
— Qazaq ádebıetin jaqsy kóretin oqyrmandar úshin bul – óte jaqsy joba. Árıne, qazaqtyń aýyzsha jáne jazba ádebıeti 100 kitappen shektelmeıtini anyq. Onyń qory óte mol. Sonyń ishinde elenbeı qalǵan, aıtylmaı júrgen shyǵarmalar tizimge enip, óz oqyrmanyn tabady degen oıdamyn. Bul – kezinde jaqsy oqyrman jınap, keıin túrli sebeptermen kóleńkede qalyp qoıǵan shyǵarmalarǵa ekinshi tynys beredi. Qazir adamdar trendtegi kitaptardy oqıdy. Alaıda qazaq ádebıetinde keremet shyǵarmalar bar. Mysaly, Ǵalym Ahmettiń «Jem boıynda» atty tarıhı romany men Tobyq Jarmaǵambetovtyń «Otamaly» shyǵarmasyn atap ótýge bolady, - dedi «Ulan» gazetiniń bas redaktorynyń orynbasary Aslan Tilegen.
Saýalnamaǵa 5 myńynshy jáne 11 000-shy bolyp tirkelgen qatysýshylarǵa joba seriktesi – «Meloman-MARWIN» dúkender jelisi arnaıy sertıfıkat tartý etti.
Aıta keteıik, daýys berý 23 shildege deıin jalǵasady. Al qorytyndy tizim 10 tamyz – Abaı kúnine oraı jarııalanady.