Otandastarymyzdyń 71,3 paıyzy sot organdarynyń jumysyna kóńili tolady

ASTANA. QazAqparat - Qazaqstandaǵy sot jumysyna tutynýshylardyń qanaǵattaný deńgeıin anyqtaýǵa baǵyttalǵan saýalnamaǵa 12 myńnan astam respondent qatysyp, olardyń 71,3 paıyzy sot organdaryna dán rıza ekenin aıtqan.

Bul týraly QR Prezıdenti janyndaǵy Ortalyq kommýnıkatsııalar qyzmetinde «QR sottarynyń qyzmetine qanaǵattanýshylyq máselesi boıynsha áleýmettik saýalnamanyń nátıjesi týraly eseptiń tanystyrylymy» taqyrybynda ótken baspasóz máslıhatynda belgili boldy.

«Zań ústemdigin qamtamasyz etý - BUU DB jumysyndaǵy negizgi baǵyttardyń biri. Osy oraıda sot júıesiniń jumysyndaǵy sapaly ózgeristerdiń deńgeıin anyqtaý úshin Qazaqtannyń barlyq óńirlerindegi sot qyzmetin paıdalanýshylarǵa áleýmettik zertteý júrgizilgen bolatyn. Saýalnamaǵa respýblıkadaǵy 193 sot qamtylyp, 12 myńnan astam respondent qatysty», - dep atap ótti baspasóz máslıhatyna qatysqan BUU DB-nyń Qazaqstandaǵy turaqty ókiliniń orynbasary Mýnhtýıa Altangerel. Al quqyqtyq saıasatty zertteýshi Nazgúl Erǵalıevanyń aıtýynsha, atalǵan táýelsiz áleýmettik saýalnamaǵa qatysqan respondentterdiń 71,3%-y sot organdaryna kóńili tolatynyn aıtqan.

«Aǵymdaǵy jyldyń aqpan-mamyr aılarynda júrgizilgen saýalnama kezinde biz ádilsot tıimdiligi jónindegi Eýropalyq komıssııanyń jáne Sottardy jetildirýdiń halyqaralyq konsortsıýmynyń ádistemelik usynystaryn qoldandyq. Júrgizlgen zertteý nátıjesi boıynsha, saýalnamaǵa qatysqandardyń 71,3%-y sot organdaryna kóńili tolatyndyqtaryn aıtty. Taldaý kórsetkendeı, sottyń taraptar usynǵan negizder men dálelderge tolyq kóńil bólýi jáne sýdıaǵa sený sekildi faktorlar saýalnamaǵa qatysýshylar qanaǵatynyń jalpy deńgeıine áser etken. Bul faktorlar sáıkesinshe 77,4% jáne 78,3%-dy quraǵan», - dep túsindirdi N. Erǵalıeva.