Otandastarymyz Koreıadan aıyppul tólemeı shyǵa alady
ASTANA. KAZINFORM — Qazaqstandyqtar bul múmkindikti 2025 jylǵy jeltoqsannan 2026 jylǵy aqpan aıyna deıin qosa alǵanda paıdalana alady.
Eńbek jáne halyqty áleýmettik qorǵaý mınıstrligi Koreıa Respýblıkasynyń Ádilet mınıstrligimen zańsyz kóshi-qondy azaıtý jáne azamattarymyzdyń quqyqtaryn qorǵaý máseleleri boıynsha júrgizilgen kelissózder barysynda, Koreıada zańsyz jumys istegen qazaqstandyqtarǵa aıyppulsyz jáne qaıta kirýge tyıym salynbastan elden erikti túrde shyǵýǵa múmkindik beretin erikti qonys aýdarý baǵdarlamasynyń merzimderin keńeıtýge ýaǵdalasty.
— Bizdiń otandastarymyz bul múmkindikti 2025 jylǵy jeltoqsannan 2026 jylǵy aqpan aıyna deıin qosa alǵanda paıdalana alady, — delingen Eńbekmıni habarlamasynda.
Bul sharalar quqyqtyq saldarlardy jeńildetýge jáne óz mártebesin retteýge daıyn adamdardy qoldaýǵa baǵyttalǵan. Baǵdarlama qylmystyq quqyqbuzýshylyq jasaǵan, májbúrlep shyǵarý sharasyna jatatyn, sondaı-aq 2025 jylǵy 1 jeltoqsannan keıin zańsyz mártebege túsken sheteldikterge qoldanylmaıdy.
— Baǵdarlamaǵa qatysý úshin tólqujat, erikti qonys aýdarý týraly ótinish jáne áýe bıleti qajet. Aldyn ala habarlama Koreıa Respýblıkasynyń ımmıgratsııa keńseleri arqyly ushý kúnine deıin 15-ten 3 kúnge deıingi merzimde beriledi Eńbek jáne halyqty áleýmettik qorǵaý mınıstrligi qazaqstandyqtardy shetelde tek zańdy negizde jumysqa ornalasýǵa shaqyrady. Bul zańsyz kóshi-qon, elden shyǵaryp jiberý, aıyppuldar, quqyqtyq shekteýler jáne eńbek qanaýy sııaqty táýekelderdiń aldyn alýǵa múmkindik beredi. Tek resmı jáne tekserilgen eńbek resýrstary arnalaryna júginý qajet: lıtsenzııalanǵan jeke jumyspen qamtý agenttikteri, memlekettik baǵdarlamalar jáne jumys berýshilerdiń resmı usynystary, — delingen habarlamada.
Aıta ketelik Qazaqstan men Koreıa eńbek kóshi-qony salasyndaǵy yntymaqtastyqty kúsheıtetini týraly jazǵan edik.