«Otandastar» qory Túrkııadaǵy qandastardyń bıznesimen tanysty
«Kezdesýge «El Tiregi» Qazaqstannyń shaǵyn jáne orta bıznesi qaýymdastyǵynyń Basqarma tóraǵasy Asqar Áýbákirov pen «KATKA» qazaqstan-túrik kásipkerleri qaýymdastyǵynyń bas hatshysy, «Business & Travel Central Asia» atqarýshy dırektory Dinmuhammed Zııatbekov, sonymen qatar bızneske ınvestıtsııa tartý jáne damytý isi boıynsha shaqyrylǵan sarapshylar qatysty. Shara «Otandastar» qorynyń Túrkııadaǵy qandastarmen 31 shilde kúni uıymdastyrǵan bıznes forým aıasynda ótti. Kezdesýdiń basty maqsaty - qazaq bıznesmenderdiń bıznesin Túrkııamen qatar Qazaqstan naryǵynda da damytýǵa qajetti qoldaýdy talqylaý», - delingen «Otandastar» qorynyń aqparatynda.
Qazaqstandyq delegatsııa aralap kórgen otandastar kásiporyndarynyń biri - dastarhan shyǵarýmen aınalysatyn «Akıol» kompanııasy. 50 jyldyq tarıhy bar kompanııa tolyq avtomattandyrylǵan. Eksporttyq áleýeti joǵary. Kompanııada búginde jumys isteıtin 38 adamnyń basym bóligi etnıkalyq qazaqtar. Kompanııa basshysy Eıýp Akıoldyń ózi 20 ǵasyrda Túrkııaǵa qonystanǵan qazaqtardyń urpaǵy eken. Tarıhı Otany, baýyrlar jaıynda tebirene tolǵanǵan ol, óz jınaǵan tájirıbesi men bilimin osy bıznespen aınalysqysy kelgen nemese Qazaqstanda fılıal ashýǵa nıettengen kez kelgen otandasyna berýge daıyn ekenin jetkizdi. Akıol myrzanyń ózi bıznesin 10 jyldan astam ýaqyttan beri tarıhı Otanda ashýdy josparlap júrgendikten, delegatsııanyń kelgendigine jáne Qazaqstannyń Túrkııa azamattary-etnıkalyq qazaqtarǵa kómektesýge múddeli ekendigine óte qýandy.
Delegatsııanyń at basyn tiregen kelesi jeri dastarhan, lınolıým, shanaq bólshekterin jınaqtap, sándik bezendirýdi óndirýmen jáne qaıta óńdeýmen aınalysatyn kompanııa boldy. Kompanııany ekinshi býyndy emıgrant, etnıkalyq qazaq Ifran Sevenchan basqarady. Óndiris sońǵy ónimderiniń ózindik qunynyń tómendigi, sapasynyń joǵarylyǵy arqasynda Ystanbuldaǵy uqsas ónimder arasyndaǵy kóshbasshylardyń biri bolyp tanylǵan. Búginde kompanııada 10-ǵa tarta adam jumys isteıdi. Endigi jospar - Almatyda fılıal ashý. Dıaspora ókilderimen iskerlik baılanysty damytý týraly jańalyqty Sevenchan myrza zor qýanyshpen qarsy aldy. Onyń aıtýynsha, etnıkalyq qazaqtardan shyqqan kóptegen bıznes ókili iskerlik baılanys ornatýǵa jáne jańa rynokty zertteýge múddeli.
Budan keıin delegatsııa kıim men onyń erekshelikterin, sýmkalar jáne portfelderdi áshekeıleýmen aınalysatyn kompanııaǵa bardy. Kompanııany qazaq dıasporasynyń múshesi, Túrkııada týǵan Omer Chorýhlý basqarady. Kompanııanyń óndiristik qýaty mol jáne ónimderin AQSh, Eýropa, Efıopııa, men TMD elderine shyǵarady. Kompanııa Qazaqstan qalalarynyń birinde ókildigin ashýǵa qazirdiń ózinde daıyn. Delegatsııa saparyn Qazaqstan naryǵyna shyǵýǵa múddeli, kúrteshe, ton, tulyp tigýmen jáne satýmen aınalysatyn Túrkııanyń azamaty, otandasymyz Mustafa Akıýzdyń kásipornymen tanysýmen aıaqtady. «Delegatsııa ókilderi otandastardy bıznesti damytýda jáne júıeli negizde berik iskerlik baılanys ornatýda múmkindiginshe qoldaý bolatynyna sendirdi. Basty mindeti Qazaqstanmen qatar shet elde bıznes jobalardy izdeý jáne damytýǵa kómek kórsetýge baǵyttalǵan «Atameken» iskerlik úıin qurý jobasy týraly aıtty. Uıymdastyrýshylardyń oılastyrýy boıynsha dúnıejúzilik Qazaq úıi quramyna kiretin joba saıasat pen kommertsııadan tys bolady», - delingen qordyń baspasóz baıanynda.
