Otandastar qory: Shetelden kelgen 238 qandas Qazaqstanda bilim alatyn boldy

NUR-SULTAN. QazAqparat – «Otandastar qory» kommertsııalyq emes aktsıonerlik qoǵamy shetelden kelip, bilim alýǵa nıet bildirgen ári 1 000 oryndyq grantqa syımaı qalǵan 238 ótinish berýshiniń máselesin sheshilýine yqpal etti. Bul týraly QazAqparat «Otandastar qory» KEAQ baspasóz qyzmetine silteme jasap habarlaıdy.

Aıta keteıik, bıyl shetelden kelgen qandas stýdentterdi daıyndyq kýrsyna qabyldaý emtıhany 13 qyrkúıekte ótti. Al 25 qyrkúıekte talapkerler jınaǵan balyna qaraı bólingen 1 000 orynǵa qabyldanǵan edi.

«Otandastar Qory» KEAQ 1000 orynǵa syımaı qalǵan 238 ótinish berýshiniń jaıy boıynsha QR Bilim jáne ǵylym mınıstrligine hat joldady. Al Dúnıejúzi qazaqtary qaýymdastyǵynyń birinshi orynbasary Zaýytbek Qaýysbekuly Úkimet otyrysynda osy máseleni kóterdi. Búgingi kúni másele oń sheshimin taýyp, 238 úmitker elde qalyp, bilimin tegin jalǵastyrýǵa múmkindik aldy», - delingen baspasóz baıanynda.

Toqtala ketetin jaıt, shet elderde turatyn qandastarymyzdyń Qazaqstanda bilim alýy jyldan jylǵa júıelenip keledi. Etnıkalyq qazaq jastarynyń JOO-ǵa túsýi kezinde qazaq tili men Qazaqstan tarıhy synaǵynan qınalmaýy úshin atalǵan oqý oryndarynda olarǵa arnalyp daıyndyq bólimderi ashylǵan. Otandastar qory bilim izdep kelgen shet eldik qazaq jastarynyń jataqhanamen qamtamasyz etilýine sep bolǵan edi.