«Otandastar qory» sheteldegi qazaqtarǵa qandaı qoldaý kórsetti
«Qazirgi tańda, sheteldegi qazaqtardyń túrli sebeptermen óziniń etnıkalyq biregeıliginen ajyrap bara jatqany aqparat quraldarynda jıi kóterilip júr. Sol mekendegen eliniń tıtýldyq ulttarynyń mádenıetin tolyqtaı sińirip, tilin umytyp, akkýltýratsııa men assımılıatsııaǵa ushyrap jatyr. Muny eshkim joqqa shyǵara almaıdy. Sondyqtan, «Otandastar qorynyń» osy oraıdaǵy mindeti – sol sheteldegi qazaqtardyń kózindegi tarıhı Otany Qazaqstanǵa degen qyzyǵýshylyq otyn sóndirmeý, boılaryndaǵy óship bara jatqan ulttyq sana-sezimderin oıatý, dástúrli qundylyqtardy tiriltý bolýy tıis», - dedi Abzal Saparbekuly qor janyndaǵy qoǵamdyq komıssııanyń otyrysynda.
Sonymen qatar, qor basshysy syrtqy saıasattaǵy jumsaq kúsh qaǵıdatymen Qazaqstannyń jetistikteri, elimizdiń áleýmettik-ekonomıkalyq damýyna qatysty ulttyq jobalar men baǵdarlamalary týraly, jalpy Qazaqstanǵa qyzyǵýshylyq pen súıispenshilikti arttyrý baǵyttary boıynsha aqparattyq-konsýltatsııalyq saıasatty kúsheıtý mańyzdy ekenin aıtty.
2022 jyly «Otandastar qory» álemniń 40-qa jýyq elinde ashylǵan 100-ge jýyq qazaq uıymynyń basshylarymen jáne belsendilerimen kezdesken. Sheteldegi qazaq uıymdary týraly aqparattyq anyqtama bazasy daıyndalyp, ortaq chat qurylǵan.
«Otandastar qory» sheteldegi qazaqtarǵa memleketimizdiń janashyrlyǵyn kórsetý úshin suranystaryna saı qoldaý kórsetip keledi. Ótken jyly Eýropadaǵy qazaq quryltaıy, Ózbekstandaǵy, Qyrǵyzstandaǵy qarym-qatynastyń 30 jyldyq mereıtoı sharalarynda birge jumys istedik. Altaı qazaqtarynyń Túrkııaǵa kóshiniń 70 jyldyǵyna oraı «Qazaq-túrik baýyrlastyǵy» eskertkishi ashyldy, halyqaralyq konferentsııa ótti. Túrkııanyń Alanııa qalasynda «Abai Uii» mádenı-iskerlik úıiniń ókildigi ashyldy. Reseıdiń Orynbor, Omby, Astrahan qalalarynda, Irannyń Gorgon qalalarynda qandastarymyzben birge boldyq. Sheteldegi mundaı basqosýlarda qazaqtardyń mártbesi men abyroıyn túrli mazmundyq sharalarmen kóterip kelemiz», - dedi A. Saparbekuly.
Sonymen birge, «Qorjyn» jobasy sheńberinde 2022 jyly 17 eldegi 43 qazaq ulttyq-mádenı ortalyǵyna materıaldyq kómek kórsetilgen.
«Qandastardyń kóńilin marqaıtqan mazmundy kezdesýler elimizde de kóptep uıymdastyryldy. Solardyń biri – shetelde ulttyq ónerimiz ben qundylyqtarymyzdy dáripteıtin ónerpazdar men qolóner sheberleriniń «Qasıetti qazaq eli» óner festıvali. Taraz qalasyndaǵy festıvalge 145 úmitker keldi. Álemniń 10 elinde turatyn 500-ge jýyq qandasymyz arasynda júldeli jáne erikti shyǵarmashylyq baıqaýlar ótti. Dombyra kýrsy sııaqty erikti jobalar jalǵasty. «Kıeli Qazaqstan» jobasynda álemniń 10 elinen kelgen 31 qandasymyz jańadan qurylǵan Abaı oblysynda boldy. Jobanyń maqsaty – olardyń eldegi qazaq jastarymen jáne shetelden kelgen qurby-qurastarymen pikir almasyp, baılanys qurýy», - deıdi qor basshysy.
Aqmola oblysynda 2 aptaǵa sozylǵan «Jazǵy lagerge» 10 elden 80-nen astam qazaq balasy qatysty. Bıylǵy jazǵy lagerge 185 bala qatysady dep josparlanyp otyr.
«Qorymyzdyń qazaq tilin úıretý baǵytyndaǵy aǵartýshylyq jobalary jalǵasyn tapty. 4 tilde júrgizilgen «Onlaın qazaq tili kýrsynda» jáne álemniń 8 elindegi 10 qalasyndaǵy «Oflaın qazaq tili kýrsynda» myńnan astam qandas qazaq tilin tegin úırendi. Álemniń 7 elinde qazaq tilinen dáris oqıtyn 80-ge jýyq muǵalim arnaıy «Biliktilikti arttyrý» kýrsynan ótti», - dedi spıker.
Budan bólek, qandas qalamynan týyndaǵan eńbekterge kóńil bólindi. 2022 jyly QR Prezıdenti Arhıviniń qoldaýymen Dúnıejúzi qazaqtary qaýymdastyǵynyń burynǵy tóralqa músheleri Dálelhan Janymhanulynyń «Qujattar jınaǵy» kitaby jaryq kórgen. Altaıdan Úndistan men Pákistan arqyly Túrkııaǵa jetken aıtýly kóshtiń kózi tiri kýágeri, qoǵam qaıratkeri, 100 jasqa taıaǵan Ábdirahman Chetın Jálelulynyń «Ómir jolymdaǵy sońǵy kósh» kitaby tanystyrylǵan.
Qor janyndaǵy «Qandastardy aqparattyq qoldaý ortalyǵyna» jáne 14 óńirdegi «front-keńselerine» qandastar men sheteldegi etnıkalyq qazaqtardan túsken 6 318 ótinishke aqparattyq-konsýltatsııalyq qyzmet kórsetilgen.
Qonys aýdarýǵa basymdyqqa ıe 5 óńirdiń áleýmettik-ekonomıkalyq damýy týraly jáne qolaıly eldi mekenderdi tańdaýǵa múmkindik beretin «Erulik.kz» veb-platformasy odan ary jetildirildi. Ótken jyly veb-platformanyń qyzmetin 4200-den astam adam paıdalanǵan.
