«Otandastar qory» KeAQ vıtse-prezıdenti: Qandastar atynan qazaq halqyna alǵys aıtamyz
***
«Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń Jarlyǵymen 5 jyldan beri aıryqsha qurmetpen atalyp ótetin «Alǵys aıtý kúni» - eń aldymen elimizde tynyshtyq pen úndestik, ózara senimdilik pen kúlli Qazaqstan halqyna degen shynaıy qurmettiń ornyǵýyna negiz bolǵan Ult kóshbasshysynyń beıbitshilik pen kelisim saıasatynyń saltanatty kúni.
Bul - taǵdyr taýanymen Uly Dalamyzǵa qonys aýdarǵan túrli etnostardyń qutty qonysyna aınalǵan qasıetti qazaq jeri men qonaqjaı halqymyzǵa jasalǵan taǵzymnyń belgisi. Qazaq halqy qıyn-qystaý zamanda olardyń basyna túsken aýyrtpalyqty qaıyspaı birge kótere bildi. Bul búgingi tańda elimizdegi túrli ult ókilderi arasyndaǵy adamgershilik qarym-qatynastyń ónegeli ólshemine aınaldy.
Alǵys aıtý kúni - el basyna kún týǵan kúrdeli kezeńdi ıyq tirese birge eńserip, táýelsiz Qazaqstandy qurý jolynda aıanbaı ter tókken barlyq azamattardyń bir-birine qurmet bildiretin kúni.
Oraıly osy sátte «Otandastar qory» atynan jáne óz atymnan egemendi elimizdegi biregeı birlik pen ultaralyq tatýlyqtyń uıytqysy bolǵan Qazaqstan halqy Assambleıasyn qurylǵanyna 26 jyl tolýymen de shyn júrekten quttyqtaımyn!
Aǵynan jarylyp, alǵys aıtý - rııasyz rızalyqtyń nyshany, sondyqtan búgingi jıynda eldegi qandastar men shettegi otandastar atynan alǵys arnaýymyzǵa tolyq negiz bar dep oılaımyn.
Birinshiden, bıyl - Qazaqstan Respýblıkasy Táýelsizdiginiń 30 jyldyq mereıtoıy. Eń aldymen aıtarym:
Aq bilektiń kúshimen, aq naızanyń ushymen ulan-baıtaq Uly dalamyzdy qorǵaǵan ata-babamyzdyń asyl armany bolǵan azattyqtyń aq tańyn násip etken Allaǵa sansyz shúkir, sheksiz alǵys!
Keshegi Keńester Odaǵy tarap, enshisin alǵan egemendi elimizdi Táýelsizdik táýekeline bastap, aýmaly-tókpeli kezeńde tyǵyryqtan alyp shyqqan sarabdal saıasatker Elbasymyzǵa alǵys aıtamyz!
Qazaqstan Respýblıkasy derbes memleket retinde óz Táýelsizdigin jarııa ete sala Tuńǵysh Prezıdentimiz taǵdyr taýanymen shartarapqa tarydaı shashyraǵan ulty qazaqtyń bárin taıly-tuıaǵymen Uly dala eline oralýǵa shaqyryp, bir shańyraq astyna birigýge úndedi.
Sol bir syndarly shaqta Elbasy «Alystaǵy aǵaıynǵa aq tilek» atty áıgili hatyn jarııalaǵany belgili. Qazaq kóshin jandandyrý maqsatynda «Dúnıejúzi qazaqtary qaýymdastyǵy» qurylyp, eń alǵashqy quryltaı 1992 jylǵy 28 qyrqúıek pen 3 qazan aralyǵynda Almaty qalasynda ótti.
Osy quryltaıda sóılegen sózinde Nursultan Ábishuly: «Bul dúnıede bizdiń bir ǵana Otanymyz bar, ol - táýelsiz Qazaqstan. Biz týǵan memleketimizdiń táýelsizdigin baıandy etýge, qýatyn arttyrýǵa, onyń ıgiligine, halyqaralyq qoǵamdastyqta abyroıynyń artýyna adal qyzmet etýge paryzdarmyz», óıtkeni «Bar qazaq - bir qazaq» degen jalyndy sózin aıtyp, mıllıondaǵan eldiń et-júregin eljiretip, alashqa asqaq rýh syılaǵan edi.
Artynsha atajurtty ańsaǵan aǵaıyndar elge aǵyla bastady. Táý etken Táýelsizdik rýhymen qanattanǵan qandastardyń Uly kóshine de bıyl 30 jyl tolyp otyr. Endeshe, Elbasy úndeýimen tarıhı Otanymen qaıta qaýyshqan qandastar qaýymy atynan barsha baýyrlardy qushaq jaıa qarsy alǵan Qazaq halqyna rııasyz rızalyq bildirip, sheksiz alǵys aıtqymyz keledi!
Sonymen qatar, byltyrdan beri jahandy indet jaılap, adamzat ataýlyǵa qater tóngen syndardy shaqta shet elderdegi otandastardyń da qalyń eli - qazaǵyna qaıyrymdylyq jasap, janashyrlyq tanytqan jaqsylyǵyn aıryqsha atap aıtqan jón. Qaýip áli de seıile qoıǵan joq. Osyndaı kúlliálemdik kúrdeli jaǵdaıda atajurttaǵy aǵaıynynyń amandyǵyn tilep, gýmanıtarlyq kómekterin joldaǵan shettegi janashyr otandastarymyzǵa da kópten kóp rahmet!
Táýelsizdikten bastaý alǵan Uly kósh áli tolastaǵan joq. Bir kezderi taǵdyr tálkegimen shekara asyp, shetelge aýǵan aǵaıyndardyń atamekenge aǵylýyna - 1997 jyldyń 13 jeltoqsanynda «Halyqtyń kóshi-qony týraly» Zańǵa Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevtyń qol qoıýy dańǵyl jol ashyp berdi. Nátıjesinde álemniń ár túkpirindegi talaı qazaqtyń ata qonysqa degen saýmal saǵynyshy úzilmeıtin úmitke, selkeýsiz senimge aınaldy.
Ata qonysymen qaýyshqan qandastar ózderimen birge qazaqtyń joǵalýǵa aınalǵan keıbir salt-dástúrleri men ádet-ǵuryptaryn, umytyla bastaǵan kóne sózderin ala keldi desek artyq aıtqandyq emes. Shetelde týyp, egemendikpen birge elimizge oralǵan talaı tanymal tulǵalar qazir memleketimizdiń mereıin asyryp, qandas óner juldyzdary men sahna sańlaqtary qazaqtyń atyn aıdaı álemge áıgilep júr. Al, isker baýyrlar men kásipker qandastar halyqqa qaltqysyz qyzmet etýde.
Endeshe, eldikti uran, tatýlyqty tý etken kópultty Qazaqstan halqyna myń alǵys!» degen aqjarma tilegimdi arnaımyn.
Maǵaýııa Sarbasov
«Otandastar qory» KeAQ
Vıtse-Prezıdenti
