Otandastar qory Eńbek jáne halyqty áleýmettik qorǵaý mınıstrligine ótpek

ASTANA. QazAqparat – «Otandastar qory» Eńbek jáne halyqty áleýmettik qorǵaý mınıstrligine berilýi múmkin. Buǵan deıin atalǵan qor Syrtqy ister mınıstrliginiń quzyretinde bolǵan. Ony ózge vedomstvoǵa berý sheshimi ashyq talqyǵa shyǵarylǵan Úkimet qaýlysynda jazylǵan, dep habarlaıdy QazAqparat tilshisi.

«Qazaqstan Respýblıkasynyń zańnamasynda belgilengen tártippen «Otandastar qory» kommertsııalyq emes aktsıonerlik qoǵamynyń 100 paıyz mólsherindegi aktsııalarynyń memlekettik paketin ıelený jáne paıdalaný quqyqtary Syrtqy ister mınıstrliginen Eńbek jáne halyqty áleýmettik qorǵaý mınıstrligine berilsin.

Qaýly jobasyn qabyldaý áleýmettik-ekonomıkalyq nemese quqyqtyq teris saldarǵa ákep soqtyrmaıdy. Sondaı-aq, ol bosqyndar máselesi boıynsha memlekettik saıasatty júzege asyrýǵa oń áser etedi. Atalǵan qordyń Eńbek jáne halyqty áleýmettik qorǵaý mınıstrligine berý qandastardyń quqyqtyq saýattylyǵyn arttyrýǵa, óńirlerdiń qajettilikterin eskere otyryp, olardy utymdy qonystandyrý jóninde aqparattyq-túsindirý jumystaryn júrgizýge, sondaı-aq olarǵa bastapqy kezeńde beıimdelýge jáne qordyń áleýetin tolyq kólemde iske asyrýǵa múmkindik beredi dep oılaımyz», - delingen qujatta.

Qaýlydaǵy mindetterdi oryndaý Eńbek jáne halyqty áleýmettik qorǵaý mınıstrligi men Syrtqy ister mınıstrligi jáne Memlekettik múlik jáne jekeshelendirý komıtetine júktelgen. Qujatty ashyq talqylaý 4 qarashaǵa deıin jalǵasady.