«Otandastar qory» EQYU Joǵarǵy komıssarymen turaqty baılanys ornatady
NUR-SULTAN. QazAqparat - «Otandastar qory» KEAQ-nyń birinshi vıtse-prezıdenti Talǵat Adýov pen EQYU-nyń az ulttar isteri jónindegi Joǵarǵy komıssary Lamberto Zaner kezdesti, dep habarlaıdy QazAqparat.
Onda Talǵat Adýov Lamberto Zanerge Otandastar qorynyń negizgi qyzmeti jaıynda áńgimelep, Dúnıejúzi qazaqtar qaýymdastyǵymen birlese atqarylatyn mindettermen tanystyrdy.
Júzdesýde Lamberto Zaner qyzmet barysynda sheshilýdi qajet etetin sheteldegi qazaqtardyń eń kóp kezdesetin máseleleri jaıly suraǵan bolatyn. Osyǵan oraı, mártebeli meımanǵa qazaqtar jınaqy shoǵyrlanǵan elderde qazaq tilin qoldaný keńistigi tarylyp, assımılıatsııa jáne ulttyq biregeılikti joǵaltý qaýipi bar ekeni aıtyldy. Sonymen qatar, Dúnıejúzi qazaqtary qaýymdastyǵynyń sheteldegi qazaqtardyń etnomádenı birlestikterimen tıimdi qarym-qatynas ornatyp, olardyń daralyǵyn saqtaýdaǵy mıssııasynyń mańyzdylyǵy jaıly sóz qozǵaldy.
T.Adýov qazaq tiliniń qoldanýshylary úshin etnomádenı qundylyqtardy taratýdyń negizgi quraly retindegi erekshe tarıhı mańyzdylyǵyn atap ótti. Óz kezeginde qurmetti qonaq Ortalyq Azııa elderindegi sany az ulttardyń tilin saqtaýǵa arnalǵan bilim berý baǵdarlamalarymen tanystyryp, oǵan Mońǵolııany qosýǵa nıetti ekenin bildirdi.
Lamberto Zanerdiń aıtýynsha, jobalardy júzege asyrý barysynda olar qabyldaýshy eldiń zańnamasyn saqtaýǵa jáne tildik tepe-teńdikti saqtaý óte mańyzdy ekenin basa atap ótti.
Sondaı-aq, qonaqtar Mońǵolııanyń etnıkalyq qazaqtar turatyn Baıan-Ólgeı aımaǵyndaǵy qazaq tiliniń jaǵdaıyna da qatysty áńgime órbite otyryp, sany az ulttarǵa tildi úırený men saqtaýdyń ártúrli ádisterin qoldaný múmkindikteri jaıly sóz qozǵady.
Bas qosý nátıjesinde taraptar tájirıbe almasý úshin turaqty baılanys ornatýǵa ýaǵdalasty.
