«Otandastar Qory» Dostyq úılerinen qandastardy qabyldaý bólmesin ashýdy usyndy

NUR-SULTAN. QazAqparat – «Otandastar qory» KEAQ oblystardaǵy Dostyq úılerinen qandastarǵa arnalǵan qoǵamdyq qabyldaý bólmelerin ashýdy usyndy. Bul týraly búgin «Otandastar. Bolashaqqa baǵdar» atty halyqaralyq dóńgelek ústel barysynda Qordyń birinshi vıtse-prezıdenti Talǵat Adýov málim etti, dep habarlaıdy QazAqparat tilshisi.

T.Adýovtyń aıtýynsha, shet eldegi otandastar men qazaq mádenı ortalyqtaryn qoldaý maqsatynda shekaralyq oblystarmen memorandýmdarǵa qol qoıý arqyly shet elderdegi qazaq mádenı ortalyqtaryna qamqorlyq jasaý qolǵa alynǵan. Sonymen qatar, «Otandastar Qorynyń» barlyq oblystarda qandastarǵa qoǵamdyq qabyldaý júrgizetin mamany bar. Alaıda, arnaıy qoǵamdyq qabyldaý bólmeleri joq.

«Osy rette elge oralǵan qandastarǵa qoǵamdyq qabyldaýdy sapaly deńgeıde ótkizý úshin oblys basshylarynan «Qazaqstan halqy Assambleıasy» baǵdarlamasy boıynsha qurylǵan «Dostyq úılerinen» derbes oryn berýdi suraımyz. Ekinshiden, oblystyq ákimdikterdiń aqparat taqtalarynda jáne resmı saıttarynda baılanys ortalyǵynyń jumysy jaıynda aqparat ornalastyrý týraly hat osy jyldyń qyrkúıek aıynda jiberildi. Alaıda oǵan 205 aýdandyq jáne oblystyq ákimdikterdiń osy ýaqytqa deıin tek 9-y ǵana jaýap berdi. Osy máseleni eskere otyryp, jergilikti atqarýshy organdardan aqparattyq jumystardy júıeli júrgizýge naqty qoldaý kórsetýin suraımyz», - dedi ol.

Onyń aıtýynsha, qandastardyń qujattaryn oblystyq qoǵamdyq uıymdardyń arnaıy aýdarmashylary aýdarady.

«Sondyqtan ol qujattardy Dúnıejúzi qazaqtary qaýymdastyǵy oblystyq fılıaldarynyń basshylary rastaǵany durys. Bizdiń endigi basty mindetimiz - shet elderdegi qandastar týraly jınaqtalǵan málimetterdi júıelep, qosymsha zertteýler júrgizip, ǵylymı negizde tujyrymdaý», - dedi ol.