«Otandastar qory» dıplomatııalyq korpýs jáne halyqaralyq uıym ókilderimen kezdesti

NUR-SULTAN. QazAqparat - «Otandastar qory» KEAQ Nur-Sultan qalasynda tirkelgen sheteldik dıplomatııalyq ókildikter jáne halyqaralyq uıymdardyń ókilderimen onlaın kezdesý ótkizdi.

Kezdesý barysynda «Otandastar qory» vıtse-prezıdenti Maǵaýııa Sarbasov qoǵam maqsat-mindetterine jáne qyzmetine toqtalyp, aldaǵy ýaqytta sheteldik mádenı-gýmanıtarlyq uıymdarmen yntymaqtastyqty nyǵaıtý jolyndaǵy josparyn bólisti.

Іs-shara aıasynda QR Syrtqy ister mınıstrliginiń qoldaýymen orys jáne qazaq tilderinde jaryq kórgen «Dıasporalyq qoǵamdastyqtardyń ózara is-qımyly men olardy qoldaýdyń halyqaralyq tájirıbesi» atty kitap - aqparat anyqtamalyǵynyń tanystyrylymy ótti.

Kitapta kóshi-qon jáne halyqtyń qonystanýy máselelerimen aınalysatyn halyqaralyq, óńirlik halyqaralyq uıymdardyń negizgi qurylymdary men qyzmeti týraly aqparat usynylǵan, dıasporalyq saıasattyń halyqaralyq tájirıbesi, etnıkalyq, mádenı jáne kóship kelýshiler uıymdarymen yntymaqtastyǵy qarastyrylady, olardyń resmı mekenjaıy, baılanystary kórsetiledi.

Anyqtamalyqqa bilim salasyndaǵy ulttyq, etnıkalyq, dinı jáne tildik azshylyqtardyń quqyqtaryn qorǵaý máseleleri boıynsha halyqaralyq zańnamalyq, normatıvtik quqyqtyq aktiler, sondaı-aq kóshi-qon jáne kóshi-qon saıasaty, etnıkalyq qazaqtardy tarıhı otanyna qaıtarý jáne basqa máseleler boıynsha QR normatıvtik-quqyqtyq aktileri engizildi.

Anyqtamalyq memlekettik qyzmetshilerge, dıplomattarǵa, stýdentterge, zertteýshilerge, sondaı-aq halyqaralyq qatynastar, syrtqy jáne dıasporalyq saıasat máselelerine qyzyǵýshylyq tanytqan barsha oqyrmanǵa arnalǵan.