Otandastar qory «Uly Dala» halyqaralyq kitap shyǵarý baıqaýyn jarııalady
ASTANA. KAZINFORM – «Otandastar qory» KeAQ men Qazaqstan Jazýshylar odaǵynyń respýblıkalyq qoǵamdyq birlestigi 2025 jylǵa arnalǵan «Uly Dala» halyqaralyq baıqaýyn jarııalady.
Baıqaýdyń maqsaty – sheteldegi etnıkalyq qazaqtardyń arasynda qazaq tilin, dástúrleri men mádenıetin ilgeriletý jáne nasıhattaý. Sonymen qosa sheteldegi etnıkalyq qazaqtardyń kóshi-qony tarıhy men ómir joldaryn, olardyń turmys-salty men dástúrlerin, ádebıeti men ónerin jáne basqa da taqyryptardy qamtıtyn kórkem-ádebı, tarıhı shyǵarmalar men ǵylymı zertteýler jınaǵyn shyǵarý.
Baıqaýdyń negizgi maqsaty men mindetteri
Sheteldegi etnıkalyq qazaktardyń tarıhy, mádenıeti men ádebıeti, ǵylymy, bilimi, óneri, olardyń qazaq rýhanııatyna qosqan úlesteri týraly sheteldik belgili aqyn-jazýshylar, ǵalymdar men ónerpazdardyń týyndylaryn basyp shyǵarý arqyly ulttyq tarıhymyz ben mádenıetimizdi jańa qyrynan taný.
Sheteldegi qazaqtardyń tarıhy, salt-dástúri, ádebıeti men mádenıeti, ǵylym men óneri, rýhanı damýyna úles qosqan tanymal, belgili etnıkalyq qazaq ókilderiniń esimderin qazaqstandyq kópshilik qaýymǵa keńinen tanystyrý.
Jas urpaqtyń boıynda tól tarıhymyz ben mádenıetimizge degen qyzyǵýshylyqty kúsheıtý, ulttyq sanany jańǵyrtý.
Baıqaý ótkizý merzimi jáne tártibi
Baıqaýdy uıymdastyrý jáne ótkizýge Jumysshy toby jaýapty.
Baıqaýǵa qatysý týraly ótinim men shyǵarmalar 2025 jyldyń 1 mamyryna deıin qabyldanady. Ótinimder kelesi mekenjaıǵa jiberilýi tıis: Astana qalasy, D.Qonaev kóshesi, 12/1 úı, «Otandastar qory» KeAQ, nemese poshta arqyly:otandastar2025@gmail.com
Baıqaýǵa qatysý sharttary
Baıqaýǵa shetelderdegi etnıkalyq qazaqtar, otandastar, sheteldik aqyn-jazýshylar, tarıhshylar, ǵalymdar, mádenıet, óner jáne qoǵam qaıratkerleri, jýrnalıster, jeke jáne zańdy tulǵalar qatysa alady.
Baıqaýǵa sheteldegi etnıkalyq qazaqtardyń tarıhy, salt-sanasy men dástúri, ádebıet pen mádenıet, teatr, sport, óner, ǵylymı salaǵa baılanysty shyǵarmalar, sondaı-aq sheteldegi tarıhı, belgili tanymal tulǵalar jáne olar týraly eńbekter usynylady.
Jumysqa qoıylatyn talaptar
Format: Word nemese PDF
Shrıft: Times New Roman, 14 kegel, jolaralyq ınterval – 1
Qatysýshy týraly aqparat: aty-jóni, memleketi, jasy, baılanys telefony
Avtor avtorlyq quqyqtyń berilýine kepildik beredi.
Baıqaý jeńimpazdarynyń jumystary
Baıqaý jeńimpazdarynyń jumystaryn, baspadan shyqqan kitaptardy Uıymdastyrýshy elimizdegi iri kitaphanalar men ǵylymı-mádenı ortalyqtarǵa taratady. Kitaptardyń elektrondy nusqasy «Otandastar qory» men Qazaqstan Jazýshylar odaǵynyń veb-saıttaryna ornalastyrylady.