«Otan tarıhynyń» 20 kitaby jaryq kórmek
ASTANA. 16 qyrkúıek. QazAqparat /Arman Asqarov/ - 2014 jylǵa deıin Shoqan Ýálıhanov atyndaǵy Tarıh jáne etnologııa ınstıtýty «Otan tarıhynyń» 20 kitabyn shyǵarýdy josparlap otyr. Bul týraly búgin Astanada bastalǵan Qazaqstan tarıhshylarynyń I Kongresi barysynda ınstıtýt dırektory, professor Hankeldi Ábjinov málim etti.
Onyń sózine qaraǵanda, 2012-2014 jyldary ishinde jaryq kóretin 20 kitaptyń alǵashqy 5-eýi paleolıtten bastap Shyńǵys han joryǵyna deıingi arǵyqazaqtar dáýirin qamtıdy, 3 kitap qazaq antropologııasy, etnogenezi, handyǵy, rýhanı álemi jaıly bolmaq, 4 kitap otarlanǵan ólke tarıhyna arnalady, 2 kitap keńestik jyldardaǵy tarıhty ashpaq, 4 kitap táýelsizdik taǵylymyn tarazylaıdy. 19-shy jáne 20-shy kitaptar Qazaqstan tarıhyn zertteýdiń metodologııasy men tarıhnamasyna, derekter kózine arnalmaq.
«20 kitaptan turatyn 10 tomdyq «Otan tarıhyn» Astana men Almatynyń tarıhshy ǵalymdary jazady. Buǵan aımaqtardaǵy áriptesterimiz renjimeýi kerek. Ras, búgingi tańda 5 aımaqta da - ońtústikte, soltústikte, batys pen shyǵysta, ortalyqta - arheologııa men etnologııanyń, derektaný men tarıhnamanyń, ult tarıhynyń bilikti mamandary qalyptasqan. Máselen, Semeıdegi memlekettik eki joǵary oqý ornynda, Qaraǵandy qalasyndaǵy JOO - larda 20-ǵa jýyq tarıh ǵylymdarynyń doktorlary eńbek etedi. Osy ıntellektýaldyq áleýetti aımaq tarıhyn jazýǵa jegetin ýaqyt keldi. Árıne, 20 kitap kóleminde jazý qajet emes. Ǵalymdar 2010 jyly jaryq kórgen «Qazaqstan tarıhy» bestomdyǵyn basshylyqqa alyp, óz aımaǵynyń tarıhyn sondaǵy mazmundyq qurylymmen jazyp shyqsa, quba-qup», - deıdi ǵalym.
