Otan qorǵaýshylar alańynan fotoreportaj: Astanadaǵy Uly Jeńis kúni
Bul Jeńiske Qazaqstan halqynyń qosqan úlesi sheksiz ekendigi belgili. Maıdanǵa attanǵan eki mıllıonǵa jýyq qazaqstandyqtyń jartysyna jýyǵyna týǵan jer topyraǵy buıyrmady. Al tylda qalǵan qarttar men áıelder, býyny bekimegen balalar «Bári de maıdan úshin! Bári de Jeńis úshin» degen uranmen maıdan qajettiligi úshin tynbaı eńbektendi. Keńes armııasyn qajetti oq-dári, azyq-túlik, kıim-keshekpen qamtamasyz etý úshin janqııarlyqpen jumys istegen Qazaqstan halqy maıdanǵa jaýyngerlerdiń qajettiligi úshin atalǵan zattardy úzdiksiz jóneltip otyrdy.
Búgin sonaý zulmat soǵys jyldarynda erlikpen qaza tapqan azamattarymyzdy eske alý, Jeńis kúnin búgingi urpaqqa mura etken maıdangerlerimizge qurmet kórsetý úshin elordadaǵy «Otan qorǵaýshylar» alańyna aǵylǵan qala halqy men qonaqtarynyń qarasy mol boldy. Dál osy alańǵa arnaıy at basyn burǵan Elbasymyz Nursultan Nazarbaev Qazaqstan Respýblıkasy Memlekettik kúzet qyzmeti úrmeli aspaptar orkestriniń súıemeldeýimen Máńgilik alaý janyna Dańq gúl tizbegin ákelip qoıdy, osydan keıin bir mınýt únsizdik jarııalandy.
Gúl shoqtaryn qoıý rásiminen soń Nursultan Nazarbaev arnaıy tigilgen shatyrlar qalashyǵynda ardagerlermen áńgimelesti. Memleket basshysy olardy jáne barsha qazaqstandyqtardy Jeńis kúnimen quttyqtady. «Jeńis kúni - Uly mereke. Ákelerimiz ben atalarymyzdyń arqasynda biz búgin beıbit aspan astynda ómir súrýdemiz, qýatty memleket quryp, bolashaqqa senimmen qarap otyrmyz. Qasıetti topyraǵymyzdyń bir mıllıon segiz júz myńnan astam uldary men qyzdary shaıqasty. Mıllıondaǵan adam bárin de maıdan úshin, bárin de jeńis úshin berip, bel sheshpeı eńbek etti», - dedi Nursultan Nazarbaev.
Aıt keteıik, burynǵy Keńes Odaǵynyń 27 mıllıonǵa jýyq adamyn jalmaǵan qandy qyrǵynda elimizden attanǵan 500-den astam jaýynger 1934 jyly bekitilgen eń joǵary ataq - Keńes Odaǵynyń Batyry atandy, onyń 100-den astamy - qazaqtar. Sonymen qatar 142 qazaqstandyq Dańq ordeniniń tolyq ıegeri atansa, Keńes Odaǵynyń orden, medaldarymen marapattalǵan qazaqstandyqtar sany 100 myńǵa jýyqtaıdy.
Soǵys ardagerleri jyl ótken saıyn aramyzdan azaıyp barady. Búginde Qazaqstanda 6 myń 700-ge jýyq Uly Otan soǵysynyń ardagerleri bar. Onyń 250-den astamy elordada turady.
