Otan qorǵaýshy kúnine arnalǵan búgingi sherýdi uly toı desek bolady - soǵys ardageri

ASTANA. QazAqparat - Otan qorǵaýshy kúnine arnalǵan búgingi sherýdi uly toı desek bolady. Bul pikirdi Astanadaǵy «Qazaq Eli» alańynda ótken Otan qorǵaýshy kúni men Uly Otan soǵysyndaǵy Jeńistiń 70 jyldyǵyna arnalǵan áskerı sherýden keıin soǵys ardageri Júnisbek Kárimov bildirdi.

«Otan qorǵaýshy kúni men Jeńistiń 70 jyldyq mereıtoıyna arnalǵan búgingi sherýdi uly toı desek bolady. Elbasymyz Nursultan Nazarbaevtyń arqasynda búgingi áleýmettik-ekonomıkalyq turǵyda damyǵan elge aınalyp otyrmyz. Osyǵan táýbe qylamyn. Elimiz aman, jurtymyz tynysh bolsyn!», - dedi qart maıdager.

2 ul men 1 qyz tárbıelep, búginde nemere-shebere súıip otyrǵan ardager búgingi urpaq soǵysty bilmeı, beıbit zamanda ómir súrgenine tilektes ekendigin basa aıtty.

«Qoı ústine torǵaı jumyrtqalaǵan zaman degenimiz, mine, osy kún. Sony sender kózdiń qarashyǵyndaı saqtaı bilińder», - dedi ol.