Otan qorǵaýshy kúninde ótetin jaýyngerlik sherýge daıyndyq jalǵasýda

ASTANA. 18 sáýir. QazAqparat - Jambyl oblysyndaǵy «Otar» 40-ynshy áskerı bazasy aýdanyna Otan qorǵaýshy kúnine arnalǵan Jaýyngerlik sherýge qatysýshy áskerlerdiń shoǵyrlanýy aıaqtaldy. Bul týraly QR Prezıdenti janyndaǵy Ortalyq kommýnıkatsııalar qyzmeti Qorǵanys mınıstrliginiń baspasóz qyzmetine silteme jasap habarlady.

Búgin polıgonda komandalyq-shtabtyq daıyndyq barysynda sherýdi ótkizý kezindegi barlyq is-qımyldar egjeı-tegjeıli pysyqtaldy. Áskerlerdiń jaýyngerlik sherýge daıyndyǵyna Qazaqstan Qarýly Kúshteri Qurlyq áskerleriniń bas qolbasshysy general-leıtenant Murat Maıkeev jetekshilik etýde.

«Jaýyngerlik sherýge qatysýshy bólimsheler tájirıbelik daıyndyqtar barysynda ózara is-qımyldaryn túbegeıli pysyqtaıtyn bolsa, ofıtserler sherý kezeńderin josparlaýda jáne bólimshelerdi basqarýda áskerı ónerdi joǵary deńgeıde paıdalana bilýge umtylmaq»,- deıdi Murat Maıkeev.

Qazirgi kezde «Otar» 40-ynshy áskerı bazasynda qarý-jaraq pen áskerı tehnıkany jáne polıgon nysandaryn daıyndaý qyzý júrgizilýde. 7 mamyr - Otan qorǵaýshy kúni Jaýyngerlik sherý tikeleı efır arqyly taratylady.

Onda Qurlyq áskerleriniń barlyq qarý-jaraq túrlerinen jaýyngerlik atystar júzege asyrylady. Áýe qorǵanysy kúshteri aspan keńistiginde óz sheberlikterin tanytady. Jaýyngerlik paradqa barlyǵy 7 myń áskerı qyzmetshiler, 400-den astam brondy mashınalar, avtotehnıkalar, 80-nen astam ushaqtar men tikushaqtar qatysady.