Otan qorǵaýshy kúni men Uly Jeńis merekesiniń qatar kelýinde sımvoldyq mán bar - Elbasy
ASTANA. QazAqparat - Otan qorǵaýshy kúni men Uly Jeńis merekesiniń qatar kelýiniń sımvoldyq máni bar. Búgin Astanadaǵy «Qazaq Eli» alańynda ótip jatqan Otan qorǵaýshy kúni men Uly Otan soǵysyndaǵy Jeńistiń 70 jyldyǵyna arnalǵan áskerı paradta sóz sóılegen
QR Prezıdenti, QR Qarýly Kúshteriniń Joǵarǵy Bas Qolbasshysy Nursultan Nazarbaev osylaı málimdedi. «Bul Uly Otan soǵysyndaǵy jeńimpazdar men búgingi Otan qorǵaýshylardyń arasyndaǵy áskerı dástúrlerdiń sabaqtastyǵyn ańǵartady. Maıdandaǵy aıbyndy erlik, tyldaǵy qajymas qaıratty eńbek sol Jeńistiń sheshýshi kúshi boldy. Men soǵys jáne eńbek ardagerlerin shyn júrekten quttyqtaımyn», - dedi Elbasy.
Sonymen qatar, Memleket basshysy búgin elimizdiń aıbyndy sarbazdary saltanatty marshpen «Qazaq Eli» alańynan júrip ótetinin aıtyp, bunyń Uly Jeńiske jáne Otan qorǵaýshylarǵa degen erekshe qurmet kúni ekenin alǵa tartty.
«Qymbatty qazaqstandyqtar! Elimizdiń shebi bútin, shekarasy berik bolsyn. Otanymyz tynyshtyqqa bólene bersin. Máńgilik elimiz myzǵymas beıbitshilikte bolsyn. Baıraǵymyz bıikte jelbirep, abyroıymyz asqaq bolsyn. Aıbyndy Armııamyz jasasyn! Qazaqstan jasasyn! Ýra!», - dedi N. Nazarbaev sóz sońynda.
Joǵarǵy Bas Qolbasshynyń jalyndy sózin barlyq sardarlar men sarbazdar ilip áketip, ýralady. Sosyn áskerıler Qazaqstan Respýblıkasynyń Ánuranyn shyrqap, onyń sońynan saltanatty sherý bastalyp ketti.
