Otan qorǵaýshy sportshylar: medal úshin kimder áskerı shen alady

Halyqaralyq arenalarda el namysyn qorǵaıtyn sportshylar jeńis tuǵyrynan kóringen sátte kók Týymyz kóterilip, Ánuranymyz shyrqalady. Bul — árbir qazaqstandyq úshin maqtanysh.

Búginde birqatar sportshy kásibı sportty kúshtik qurylymdardaǵy qyzmetpen ushtastyryp júr. Olardyń qatarynda Qorǵanys mınıstrliginiń Ortalyq sport klýbyna tirkelgender men Ulttyq ulannyń sporttyq komandalarynda óner kórsetetinder bar. Mundaı júıe sportshylarǵa áskerı qyzmet pen sporttyq mansapty qatar damytýǵa múmkindik beredi.

Mereke qarsańynda osyndaı sportshylardyń eń tanymaldaryna toqtalamyz.

Eldos Smetov

Maıor Eldos Smetov — QR ІІM Ulttyq ulany Sporttyq komandasyn daıarlaý ortalyǵynyń áskerı qyzmetshisi. Rıo Olımpıadasy 2016 barysynda kúmis medal jeńip alǵannan keıin oǵan merziminen buryn leıtenant sheni berildi.

Parıj Olımpıadasy 2024 kezinde ol kapıtan sheninde boldy. Atalǵan dodada tarıhı altyn medal ıelengennen keıin sportshy maıor shenine kóterildi.

Búginde Eldos Smetov Іshki ister mınıstrligi júıesinde qyzmet etedi. Ol «Dınamo» sport qoǵamy men Ulttyq ulan quramynda óner kórsetedi.

Narıman Qurbanov

Narıman Qurbanov — QR Qarýly kúshteriniń qyzmetkeri sportshy-nusqaýshy. Ol 2024 jyly ótken Parıjdegi jazǵy Olımpıada oıyndarynda jeke esepte kúmis medal ıelendi. Osy jetistigi úshin Qorǵanys mınıstri sportshyny «El qorǵany» vedomstvolyq medalimen marapattady.

Alaıda sol kezde Narıman Qurbanovtyń ofıtserlik áskerı sheni bolmaǵan. Osyǵan baılanysty oǵan áskerı ataq berilgen joq.

Al 2024 jyldyń jeltoqsanynda sportshyǵa «QR eńbek sińirgen sport sheberi» ataǵy tabystaldy.

Demeý Jadraev

Demeý Jadraev — QR Qarýly Kúshteri Ortalyq sport klýbynyń sportshy-nusqaýshysy.

Balýan 2024 jyly ótken Parıj Olımpıadasynda kúmis medal jeńip aldy. Aıtýly jetistigi úshin oǵan merziminen buryn kapıtan áskerı sheni berildi. Sondaı-aq, «El qorǵany» vedomstvolyq medalimen marapattaldy.

Gýsman Qyrǵyzbaev

Gýsman Qyrǵyzbaev, Demeý Jadraev sııaqty, kapıtan áskerı shenine ıe. Ol — QR Qorǵanys mınıstrligi Ortalyq sport klýbynyń áskerı qyzmetshisi.

Parıj Olımpıadasy barysynda sportshy qola medal jeńip aldy. Osy nátıjeden keıin Qorǵanys mınıstriniń buıryǵymen oǵan kapıtan sheni merziminen buryn berildi.

Olımpıada kezinde Gýsman Qyrǵyzbaev aǵa leıtenant sheninde bolǵan.

Qyzyqty derek: dál osyndaı kapıtan sheni onyń egiz aǵasy Gýmar Qyrǵyzbaevqa da merziminen buryn berilgen. Ol qazir Ortalyq sport klýbynda dzıýdo jattyqtyrýshysy ári bólimshe basshysy qyzmetinde.

Sonymen qatar, Gýmar Qyrǵyzbaev olımpıadalyq jetistikteri úshin Qorǵanys mınıstrliginiń vedomstvolyq nagradalarymen marapattaldy.

Islam Sátpaev

Islam Sátpaev — 2024 jylǵy Olımpıadada pnevmatıkalyq vıntovkadan atý saıysynda qola medal jeńip alyp, el qorjynyna alǵashqy júldeni salǵan sportshy. Ol efreıtor áskerı shenine ıe.

Parıj Olımpıadasy bastalǵan sátte Islam Sátpaev qatardaǵy jaýynger sheninde edi. Olımpıada aıaqtalǵannan keıin, QR Qorǵanys mınıstriniń buıryǵymen oǵan kezekti áskerı shen — efreıtor berildi.

Sportshy QR Qorǵanys mınıstrligi Ortalyq sport klýbynyń sporttyq rotasynda qyzmet 
etedi.

Olımpıadadaǵy qola medal úshin ol «El qorǵany» II dárejeli vedomstvolyq medalimen jáne «Parasat» ordenimen marapattaldy.

Maksut Jumaev

Maksut Jumaev — maıor áskerı shenine ıe. Ol QR Qarýly Kúshteri Ortalyq sport klýby taýly daıyndyq ortalyǵynyń shtattyq áskerı qyzmetshisi ári nusqaýshysy.

2020 jyldyń mamyr aıynda oǵan kezekten tys maıor sheni berildi. Buǵan deıin ol kapıtan sheninde qyzmet atqarǵan.

Jumaev — álemdik alpınızmniń tanymal tulǵasy. Ol qosymsha ottegisiz jer sharyndaǵy barlyq 14 segiz myńdyq shyńdy baǵyndyrǵan álemdegi 12-shi alpınıst. Kazakh Everest Team ekspedıtsııasy aıasynda 2024 jyldyń mamyr aıynda Everest shyńyn úshinshi ret baǵyndyrdy.

Sonymen qatar, ol alpınızmnen QR eńbek sińirgen sport sheberi jáne «Qurmet» ordeniniń ıegeri.

Rızabek Aıtmuhan

Rızabek Aıtmuhan — jas býyn sportshylarynyń jarqyn ókili.

Rızabek Aıtmuhan QR eńbek sińirgen sport sheberi ataǵyna ıe. Ol quqyq qorǵaý salasynda da qyzmet atqarady. Sportshy jedel qımyldaıtyn arnaıy jasaq qataryna sanaly túrde qosylǵan. Bul sheshimine Otanǵa qyzmet etip júrgen áriptesteri men aǵa býyn sportshylary úlgi bolǵan. Búginde sportshy bul qyzmet onyń tártipke, tózimdilikke jáne maqsatqa adal bolýǵa baýlyǵanyn aıtady.

Qazaqstannyń birqatar sport sańlaqtary áskerı qyzmetti qatar atqaratyn ofıtserler quramyna kiredi.

Danııar Eleýsinov Rıo Olımpıadasy 2016 chempıony. Ol Ulttyq ulannyń leıtenanty shenine ıe.

Vasılıı Levıt sol Olımpıadada kúmis medal jeńip alyp, leıtenant áskerı shenin ıelendi.

Ádilbek Nııazymbetov London Olımpıadasy 2012 jáne Rıo Olımpıadasynda kúmis júldeger atandy. Ol Ulttyq ulannyń kapıtany shenine merziminen buryn kóterildi.

Ivan Dychko eki Olımpıadada da qola medal ıelenip, kapıtan áskerı shenin aldy.

Áskerı qyzmetshilermen jumys isteıtin sport mamandary da bar. Mysaly, UFC-diń burynǵy faıteri Sergeı Morozov áskerı qyzmetshiler men kúshtik qurylym ókilderine arnalǵan qoıan-qoltyq urys jáne MMA boıynsha sheberlik sabaqtaryn ótkizedi. Ol jattyǵýlar barysynda parterlik kúres tásilderin, soqqydan qorǵaný ádisterin jáne jekpe-jek kezindegi psıhologııalyq daıyndyqty úıretedi.

Osyǵan deıin Qazaqstanda saperlar qalaı daıarlanatyna sholý jasaǵanbyz.