Otan qorǵaýshy kúninde áskerı qyzmetshiler baspanaly boldy
ASTANA. KAZINFORM – Otan qorǵaýshy kúnine oraı Qazaqstan Respýblıkasy Qorǵanys mınıstri avıatsııa general-leıtenanty Dáýren Qosanov áskerı qyzmetshilerge Joǵarǵy Bas Qolbasshynyń atynan jańa páterlerdiń kiltterin tabystady. Bul týraly Qorǵanys mınıstrligi habarlady.
Bul ıgi shara – el qaýipsizdigin qamtamasyz etip júrgen azamattarǵa kórsetilgen qurmet pen qoldaýdyń aıqyn kórinisi.
– Bul Otan qorǵaýshylarǵa memleket tarapynan jasalǵan shynaıy qurmet pen qamqorlyq belgisi. Áskerı qyzmetshilerdiń áleýmettik jaǵdaıy árdaıym nazarda. Búgingi tabystalǵan páterler – sizder jasaǵan qajyrly eńbekke berilgen laıyqty baǵa. Jaýyngerdiń jeńisi – onyń artyndaǵy tylyna baılanysy, ol tyl - otbasy. Áskerı qyzmetti adal atqarý úshin, áleýmettik jaǵdaıǵa jaltaqtap artqa qaramaý óte mańyzdy. Búgin Memleket basshysy atynan sizderge jańa páter kiltterin tabystaldy. Ár shańyraqta erteń el tizginin ustaıtyn, Otanyna adal qyzmet etetin ulyqty urpaq ósip-jetiledi dep senemin, - dedi Qorǵanys mınıstri avıatsııa general-leıtenanty Dáýren Qosanov.
QR Qorǵanys mınıstrligi Qurlyq áskerleriniń bas qolbasshysy general-maıor Mereke Kóshekbaev te áskerı qyzmetshilerdi qonystoımen quttyqtady.
– Bul úı Memleket basshysynyń tarapynan sizderge kórsetilip otyrǵan úlken qamqorlyq pen qoldaýdyń aıqyn kórinisi. Otanǵa adal qyzmet etińizder. Aıbyndy armııamyzdyń abyroıy arta bersin. Jańa baspana qutty bolsyn. Árqashan shańyraqtaryńyz bıik, keregelerińiz berik bolsyn, - dedi Qurlyq áskerleriniń bas qolbasshysy general-maıor Mereke Kóshekbaev.
Jańa baspanaǵa ıe bolǵan 15 áskerı qyzmetshi men olardyń otbasylary úshin bul erekshe qýanysh pen úlken kómek. Jańa úıde turmysqa qajet dúnıeniń bári bar. Іshindegi jańa jıhaz ben turmystyq tehnıka da kózdi qýantady.
– Men búgin eki bólmeli úıdiń kiltin aldym. Men jáne meniń otbasym úshin bul úlken qýanysh. 11 jyldan beri áskerı bólimde telefonısshi bolyp qyzmet atqaramyn. Merekede osyndaı syılyq jasaǵan joǵary basshylyqqa úlken alǵysymdy aıtamyn, - dedi efreıtor Dınara Bekmaǵambetova.
Memleket tarapynan kórsetilip jatqan mundaı qamqorlyq áskerı qyzmettiń bedelin arttyryp, jaýyngerlerdiń el aldyndaǵy jaýapkershiligin odan ári nyǵaıta túsedi. Jańa qonysta shashý shashylyp, úlken kisiler bata berdi.
– Biz úshin búgin óte qýanyshty kún. Baspanaly boldyq. 6 balanyń ákesimin. Merekede osyndaı keremet syılyq jasap, kóńilimizdi kókke jetkizgen Joǵary Bas Qolbasshyǵa, Qorǵanys mınıstrligine alǵysym sheksiz. Barlyq áriptesterime juǵysty bolsyn, - dedi 87962 áskerı bóliminiń bólimshe komandıri serjant Álimjan Yrysbekov.
Serjant Álimjan Yrysbekovtyń kishkentaı qyzy Aıym Rahymberdi de qýanyshty balalyq kóńil-kúıimen bólisti.
– Alaqaı, biz búgin páter aldyq. As úıde anam jáne ápkelerimmen birge ákem men aǵalaryma táttiler pisiremiz, - dedi 6 jasar Aıym Rahymberdi.
Búginde Qazaqstannyń aıbyndy armııasy batyr babalardyń dańqty jolyn laıyqty jalǵastyryp keledi. Áskerı qyzmetshilerimiz – qasıetti Táýelsizdigimizdiń berik qalqany. Olar elimizdiń tynyshtyǵyn, jerimizdiń tutastyǵyn qas qaqpaı kúzetip tur.
