Otadan soń dárigerler sportpen aınalysýǵa tyıym salǵan amerıkalyq arý Ýnıversıadada kúmis aldy
ASTANA. QazAqparat - Omyrtqasyna jasalǵan otadan soń dárigerler snoýbordıngpen aınalysýǵa tyıym salǵan amerıkalyq arý Ýnıversıadada kúmis medal aldy. Bul týraly Amerıka konsýldyǵynyń Feısbýktaǵy paraqshasynda habarlandy.
Amerıkalyq snoýbordshy arý vıdeoda áýeli ózderiniń bólmesin kórsetip, onda jaıly turyp jatqandyǵyn aıtady. Keıin óziniń bul sport túrimen 3 jasynan bastap aınalysqanyn, 7 jasynan jarystarǵa qatysa bastaǵanyn baıandaıdy. Sportshy óziniń basynan ótken myna bir oqıǵany da eske alady.
«10 jasymda mende skolıoz derti baryn bildim. 11 jasymda omyrtqama ota jasap, dárigerler maǵan budan bylaı snoýbordıngpen aınalysýǵa bolmaıtynyn aıtty. Biraq men keıin snoýbordpen syrǵanaýdyń ebin taýyp, ári qaraı da jarystarǵa qatysa bastadym. Bul sportta bıikti baǵyndyrǵan da, tómenge qulaǵan da sátterim boldy. Sonda da men bul sportty súıem», - deıdi Karrogan Meggı.
Sondaı-aq, AQSh sportshysy kedergiler arqyly juptasyp syrǵanaýdan alǵan áserimen de bólisti.
«Qar jamylǵysy qatty, biz osyndaı qardy unatamyz. Oıyq tustary da sapaly jasalǵan», dedi ol.
Sóz arasynda Meggı Almatyda ózderin jaıly sezinetinderin, saıysqa saqadaı saı bolǵandaryn aıtty.
