Otadan keıingi úıden ońaltý tásili bıýdjet shyǵynyn 50% únemdeıdi — Aıgúl Qasymova
ASTANA. KAZINFORM — Astanadaǵy № 10 emhana qazir Respýblıkalyq alǵashqy medıtsınalyq-sanıtarııalyq kómek ortalyǵy retinde jumys istep tur. Ortalyq mamandary Densaýlyq saqtaý mınıstrligi uıymdastyrǵan baspasóz týrynda atalmysh qanatqaqty joba medıtsınalyq qyzmettiń qoljetimdiligine qalaı áser etkenin aıtty.
Ortalyq dırektory Aıgúl Qasymova mundaǵy joba sátti iske assa, tájirıbesin búkil respýblıkaǵa taratý kózdelip otyrǵanyn aıtady.
Qazir elimizde bir dárigerge orta eseppen 1700 turǵyn bekitilgen. Bul kóbine ár mamanǵa jazylý úshin uzyn-sonar kezekke turǵan
Osy uzyn-sonar kezekti seıiltip, naýqastyń dáriger qabyldaýyn kútetin ýaqytyn meılinshe azaıtý úshin eki jyldan beri medbıkelerdiń óz betimen patsıent qabyldaýy qolǵa alynǵan.
«Bizdiń ortalyq eki jyl buryn osy tájirıbeni alǵashqylardyń biri bolyp qolǵa aldy. Sonyń aıasynda medıbekelerdiń biliktiligin udaıy arttyryp otyrmyz. Jańa júıe boıynsha endi dáriger dıagnoz qoıyp, naýqastardy emdeýge kóbirek múmkindik alady. Al medbıkeler turǵyndardy ekpege shaqyryp, aýyrmaýdyń jolyn izdep júrgen adamdardy qabyldaıdy. Onyń syrtynda dáriger qoıǵan dıagnoz ben emdeý tásili boıynsha retsept taǵaıyndaıdy. Bul dárigerdiń jumysyn jeńildetip qana qoımaı, medıtsınalyq qyzmettiń qoljetimdiligin arttyrady», — deıdi ortalyq dırektory.
Bul ortalyqta ambýlatorııalyq hırýrgııa ortalyǵy jumys istep tur. Bul da hırýrgııa salasyndaǵy jańashyldyqtardyń biri deýge bolady. Bul ortalyqta ota jasatqan naýqastar, qysqa merzimniń ishinde úıine oralyp, ońaltý emderin óz otbasynyń ortasynda qabyldaıdy.
«Ambýlatorııalyq hırýrgııa ortalyǵy respýblıkalyq bıýdjetke túsetin aýyrtpalyqty azaıtady. Mundaı júıe qalypty hırýrgııadan 40-50 paıyz únemdi. ıAǵnı, munda ota jasatqandar emhanada táýliktep jatpaıdy. Bizdiń ortalyq kúnine 10-15 adamǵa ota jasaıdy. Negizgi baǵyttary — jalpy hırýrgııa, ýrologııa, proktologııa, gınekologııa, oftalmologııa, qan-tamyr hırýrgııasy jáne taǵy basqalar», — deıdi Aıgúl Qasymova.
Bul ortalyqqa Astana qalasynyń 67 myń turǵyny bekitilgen. Onyń 22 myńy — bala.
Josparly qýaty bir aýysymda 500 adam qabyldaýǵa arnalǵan. Alaıda jyl basynan beri bir aýysymda orta eseppen 1 100 adam júgingen.
