Otadan keıin deni saý, kádimgi adamǵa aınaldym – Júregin aýystyrǵan almatylyq
ALMATY. QazAqparat – Osy jyldyń shilde aıynda Kardıologııa jáne ishki aýrýlar ǴZI-da júregin aýystyrǵan 23 jastaǵy almatylyq Danııar Baıdýlaev otadan keıingi ómiri jaıly aıtty, dep habarlaıdy QazAqparat tilshisi.
Bala kúninen júrek aýrýyna shaldyqqan almatylyq jas jigit donordy 7 jyl kútken. Danııar Baıdýlaevtyń aıtýynsha, jaǵdaıy kún saıyn jaqsaryp keledi.
«Ózimdi qalypty sezinemin. Kún saıyn jaǵdaıym jaqsaryp keledi. Otadan keıin deni saý, kádimgi adamǵa aınaldym. Aıtarlyqtaı eshqandaı ózgeshelik joq. Kútý tiziminde men 2016 jyldan beri turdym jáne donordy 7 jyl kúttim. Operatsııaǵa deıin fızıkalyq belsendilikti kótere almaıtynmyn. Arnaıy josparym joq. Birinshi jyly tolyq qalpyna kelgim keledi, fıtnes-zalǵa baryp, denemdi shynyqtyramyn. Sondaı-aq jumysymdy ózgertkim keledi, biraq men naqty ne istegim keletinin áli sheshken joqpyn», - deıdi Danııardyń ózi.
Kardıologııa jáne ishki aýrýlar ǴZI kardıohırýrgııa bólimshesiniń meńgerýshisi Rústem Tóleýtaevtyń sózinshe, irikteý krıterııleri bar: retsıpıent qan tobyna, dene salmaǵynyń ındeksine, boıyna qaraı tańdalady. Donordyń salmaǵy retsıpıenttiń salmaǵynan 30% - dan aspaýy tıis. Júrek donory 60 jastan aspaýy kerek. Óıtkeni mundaı júrektiń kardıopatııa men júrek jaraqaty joq, qalypty EKG jáne EHOKG bar qalpyna keltirý úshin jetkilikti rezervi bar.
«Qazir Danııar aýrýhanadan shyqty, úıinde. Biz onymen kúndelikti baılanystamyz. Transplantatsııadan keıin patsıentti baqylaýda ustaý eki fazadan turady: erte ındýktsııa jáne uzaqmerzimdi qoldaý júrgizý. Oń jaq qarynshanyń endomıokardıaldy bıopsııasy alyndy, bul – transplantty qabyldamaý dıagnozyn anyqtaý úshin asa qajet standart. Aǵzany qabyldamaý dıagnozynyń aldyn alý maqsatynda ımmýnosýpressıvti terapııa júrgiziledi. Danııardyń jaǵdaıy jaqsy», - deıdi Rústem Tóleýtaev.
Aıtýynsha, Qazaqstanda 2012 jyldan bastap UǴKO basshylyǵymen 90-nan astam donorlyq júrek transplantatsııasy jasaldy. Búginde júrek transplantatsııasyn kútý paraǵynda 140 eresek adam men 7 bala bar.
Buǵan deıin Almatyda qaıtys bolǵan áıel 4 adamǵa donor bolǵany týraly jazǵan edik.
