Osyndaı qýatty armııasy bar memlekettiń bolashaǵy zor - Kókshetaý turǵyny
ASTANA. 7 mamyr. QazAqparat - «Osyndaı qýatty armııasy bar memlekettiń bolashaǵy zor», - dep bólisti «Otar» 40-áskerı bazasynda ótken áskerı jaýyngerlik paradtan keıingi áserimen aqyn, Kókshetaý qalalyq kitaphanalar júıesiniń dırektory Baýyrjan Qaraǵyzuly.
«Búgin Otar áskerı polıgonynda ótken Qazaqstan Qarýly Kúshteriniń áskerı paradyn teledıdardan otbasymmen otyryp tamashaladym. Bári óte jaqsy ótti. Egemen elimizdiń osyndaı kúshti de qýatty áskeri bar ekeni boıyńa qaırat berip, maqtanysh sezimin uıalatady eken. Ásirese ushaqtar men tikushaqtar arnaıy operatsııalar oryndaǵan kezde kishkentaı uldarym «Men de osyndaı ushqysh bolǵym keledi!» dep, qoldaryn sozyp, ústeldi aınala júgirgenin qaıtersiń!?», - dedi ol QazAqparat tilshisine bergen suhbatynda.
«Osyndaı qýatty armııasy bar memlekettiń bolashaǵy zor dep oılaımyn. Árıne, mundaı qarýlardy tek beıbit ómirde, sarbazdardyń jattyǵýynda ǵana kóreıik, elimiz tynysh, jurtymyz aman bolsyn!», - dep qosty B. Qaraǵyzuly.
