Osydan týra 7 jyl buryn 27 jeltoqsan qaraly kún bolyp jarııalanǵan edi

TALDYQORǴAN. QazAqparat - Elimizde osydan týra 7 jyl buryn dál búgingi 27 jeltoqsan - aza tutý kúni bolyp jarııalandy, dep habarlaıdy QazAqparat tilshisi.

2012 jyl. 25 jeltoqsan. Shekara qyzmetiniń basshylary mingen áskerı An-72 ushaǵy apatqa ushyrady. Talqandalǵan tehnıkadan tiri jan aman qalmady. Borttaǵy 27 adamnyń barlyǵy opat boldy. Áýe kemesi burynǵy Ońtústik Qazaqstan, qazirgi Túrkistan oblysynyń Saıram aýdanyna qulaǵan bolatyn. Oqıǵa kýágerleri ushaq qulaǵan kezde jarylys bolyp, órt sodan keıin bastalǵanyn jetkizgen edi.

2013 jyl. 29 qańtar. Kókshetaýdan Almatyǵa ushqan «Skat» áýe kompanııasynyń jolaýshylar ushaǵy týra Almaty mańynda apatqa ushyrady. Borttaǵy 21 adamnyń barlyǵy kóz jumdy. Áýe kemesiniń dittegen jerine jetýine sol sátte sanaýly mınýttar ǵana qalǵan edi. Kýágerlerdiń aıtýynsha, apattyń qatty bolǵany sonsha, marqumdardyń denesi birneshe bólshekke bólinip ketken. Sol sátte áýejaıdan týystaryn kútip alýǵa kelgen jaqyndary týystarynyń denesin daladan izdeýge májbúr bolǵan edi.

2016 jyl. 28 qańtar. Almaty oblysynda Úsharaldan Taldyqorǵanǵa naýqas balany jetkizbek bolǵan sanavıatsııa tikushaǵy apatqa ushyrady. Borttaǵy bes adamnyń barlyǵy mert bolyp, olardyń denesi 15 saǵattyq izdeýden soń ǵana tabylǵan bolatyn. Bul apatqa «Aspan» áýe kompanııasynyń ókili qylmystyq kodekstiń 344 babynyń 3 tarmaǵy boıynsha kináli bolyp tanylyp, oǵan 4 jylǵa basbostandyǵynan shekteý jazasy taǵaıyndaldy.

2019 jyl 28 naýryz. Qyzylorda oblysynda áskerı tikushaq apatqa ushyrap, borttaǵy 13 adamnyń bári qaza tapty. Aıta keteıik, «Bek Eır» áýe kompanııasyna tıesili ushaqtyń biri 2016 jyly Astana áýejaıynda shassıi ashylmaı qalyp, apatty jaǵdaıda qonǵan bolatyn. Sol sátte bortta 121 adam bolǵan.