Osy jasymda saılaýǵa qatysqanyma rızamyn - Q.Ahmetova, 104 jasta, BQO
ORAL. 17 qańtar. QazAqparat /Eljan Eraly/ - Osy jasymda saılaýǵa qatysqanyma rızamyn. Bul týraly saılaý kúni óz úıinde daýys bergen, Aqjaıyq aýdany Jaıyq aýyldyq okrýginde turatyn 104 jastaǵy Qapıza Ahmetova málim etti.
Q.Ahmetova 1908 jyly qazirgi Terekti aýdany Kónekketken aýylynda dúnıege kelgen. Bar ómiri Jaıyqtyń jaǵalaýynda ótken. Azamat soǵysy, ujymdastyrý, Uly Otan soǵysy, tyń kóterý - báriniń salmaǵyn elmen birge kótergen keıýana búginde qyzy Kúljan Jantýrınanyń qolynda turady. Eri Uly Otan soǵysynda habarsyz ketkennen keıin eki qyzymen qalǵan ol qaıtyp turmys qurmaǵan.
«Basymyzdan neshe túrli zaman ótti. Qıynshylyqty da, qýanyshty da kórdik. Táýelsiz elimiz qarııalarǵa bar jaqsylyqty jasap otyr. Osydan artyq ne kerek! Saılaý kúni de umytpaı, komıssııa músheleri jáshigin alyp, úıge keldi. Elimiz aman, jurtymyz tynysh bolsyn», deıdi Q.Ahmetova.
