«Osy sóziń úshin jaýap beresiń»: Óskemen ákimi jeli qoldanýshysymen kelisimge keldi
ÓSKEMEN. QazAqparat – Óskemen qalasynyń ákimi Jaqsylyq Omar Instagram jelisindegi jazbasyna pikir qaldyrǵan qala turǵynyna «Osy sóziń úshin jaýap beresiń» dep habarlama jibergen edi. Endi shahar basshysy men jeli qoldanýshysy ortaq til taýyp, kelisimge keldi, dep habarlaıdy QazAqparat tilshisi.
Sandra_ouz búrkenshik esimdi azamat Óskemen qalasy ákiminiń «osy sóziń úshin jaýap beresiń» dep jazǵanyn skrınshotqa túsirip jelige jarııalaǵan. Onyń jazýynsha, tanysynyń synı pikirine qatysty qala basshysy osyndaı habarlama jibergen.
Kóp uzamaı Jaqsylyq Omar ne sebepti solaı jazǵanyn túsindirgen bolatyn.
«Meni qala basshysy retinde ekijúzdi dep aıyptaý qorlyq dep sanaımyn. Árıne, ózimniń ar-namysyma tıgen mundaı dálelsiz sózdi eleýsiz qaldyra almaımyn», - degen edi ol.
Endi shahar basshysy men jeli qoldanýshysy kezdesip, ortaq mámilege keldi.
«Óskemen qalasynyń ákimi men azamattyq qoǵam belsendisi arasyndaǵy bul oqıǵa tatýlasýmen aıaqtaldy. Jazbaǵa pikir qaldyrǵan @sanko999 búrkenshik esimdi jeli qoldanýshysy men Jaqsylyq Omar sóılesip, ortaq til tapty. Olar bir jaǵynan bılikti synaýdyń qajettigin, ekinshi jaǵynan synnyń oryndy jáne jeke basqa qatysty bolmaýyna kelisti», - dedi Óskemen qalasy ákiminiń keńesshisi Álibek Tursymbetov.
