Osy salany tańdaýyma kindik sheshem sebepker boldy – probatsııa qyzmetinde ter tógip júrgen áıel

ÓSKEMEN. QazAqparat – Quqyq qorǵaý organynda erlermen birge áıelder qaýymy da qatarlasa jumys istep kele jatyr. Olar óz qyzmetterin tyńǵylyqty atqaryp, halyqqa kómegin tıgizý úshin esh aıanyp qalmaýda. Solardyń biri – Shyǵys Qazaqstan oblysy Shemonaıha aýdandyq probatsııa bólimine jetekshilik etip júrgen Gúlmıra Bólekbaeva, dep habarlaıdy QazAqparat tilshisi.

Gúlmıra Bólekbaevanyń quqyq qorǵaý organynda qyzmet etip kele jatqanyna 17 jyl boldy. Búgingi tańda Shemonaıha aýdandyq probatsııa bólimin basqarýda. Áriptesteriniń aldynda bedeldi, jumysta ózin tek jaqsy qyrynan kórsete bilgen. Úıde aıaýly jar, uldaryna ardaqty ana bola bilgen ol júgi aýyr jumysty ta birge alyp keledi.

«Tek er adamdar jumys isteıtin ortada júrsemde ózimdi jaısyz sezinbeımin. Olardyń maǵan degen kózqarastary jaqsy, árdaıym kómektesip turady. Osy salany tańdaýyma kindik sheshem sebepker boldy. Ol polıtsııa podpolkovnıgi bolǵan. Mektep bitirgen soń Qostanaıdyń zań akademııasyna túsip, qyzyl dıplommen bitirdim. Odan soń jumysqa ornalastym», - deıdi Gúlmıra Bólekbaeva.

Onyń aıtýynsha, jumysy mineziniń jańa qyrlaryn ashýyna kómektesti. Qaısar bola bilýge, maqsatyna jetýge, ýaqytty tıimdi paıdalanýdy úıretken.

«Sonymen qatar sportqa degen qyzyǵýshylyǵymdy arttyrdy. ÝIS-tiń qurama komandasynyń múshesimin. Jaqynda voleıboldan jarysqa baryp, 3-shi oryn aldyq. Qyzmettesterimmen únemi jaqyn aralasyp, qandaı jaǵdaı bolmasyn túsinistik tanytýǵa tyrysamyn. Qınalǵan sátterde qolushyn berýge ázirmin. Osy rette, meni jaýapkershilikke, óz isime uqypty bolýǵa úıretken ata-anama rahmet aıtamyn!, - deıdi áıel.

Aıta keteıik, búgingi tańda Shemonaıha aýdandyq probatsııa bóliminde 120 adam baqylaýǵa alynǵan.