Osy kóktemde 200 mln astam kóshet otyrǵyzyldy
«Memleket basshysynyń tapsyrmasyna sáıkes, ótken jyldan bastap el aýmaǵynda 2 mlrd aǵash otyrǵyzý naýqany bastaldy. Joba bastalǵaly elimiz boıynsha 200 mln astam aǵash kósheti otyrǵyzyldy. Al, bıyl kóktemde 100 mln jýyq kóshet egildi. Jospar boıynsha osy kóktemde 108 mln kóshet otyrǵyzýymyz kerek. Aldaǵy 10 kúnniń ishinde qalǵan 8 mln aǵashty otyrǵyzamyz. Qalǵany josparǵa sáıkes aldaǵy kúzde iske asyrylady. Sonymen qatar, otyrǵyzylǵan aǵash kóshetteriniń odan ári ósip ketýi bizdiń baqylaýymyzda. Ol úshin normatıvtik-quqyqtyq akt qarastyrylǵan. Baqylaý kúz mezgilinde júredi. Aldymen ormanshy mamandar qadaǵalaıdy, sodan soń baqylaý bóliminiń ókilderi tekseredi», - dedi Erlan Qutpanbaev QR Ekologııa, geologııa jáne tabıǵı resýrstar mınıstrligi uıymdastyrǵan baspasóz týry barysynda.
Onyń aıtýynsha, el aýmaǵynda byltyr otyrǵyzylǵan aǵash kóshetteriniń 70 paıyzy tirshiligin jalǵastyrdy. Sondaı-aq, aǵash kóshetin otyrǵyzý naýqany elimiz boıynsha kóktem jáne kúzde júredi.
«2 mlrd túp aǵashtyń ishinde 700 mln jýyǵy sekseýil, 550 mln astamy qaraǵaı, odan bólek qaıyń, terek taǵy sol sııaqty aǵash túrleri bar. Barlyq aǵash kóshetteri otandyq, atap aıtqanda ShQO men Pavlodar oblysyna tıesili. Biz qazir Aqmola oblysyna qarasty «Jasyl aımaq» orman qory sharýashylyǵynyń aýmaǵynda turmyz. Bul jerde bıyl kóktemde 5 mln astam aǵash kósheti otyrǵyzyldy. Jalpy, aǵash egý protsesi 2 ádispen oryndalyp jatyr. Biri - tuqym sebý arqyly, ekinshi joly - kóshet túrinde otyrǵyzý. Aǵash otyrǵyzý jumysy josparǵa saı júzege asyp jatyr», - deıdi ol.
Eske sala keteıik, Memleket basshysynyń tapsyrmasyna sáıkes Qazaqstanda 2021 jyldan bastap 5 jyl kóleminde orman qoryna 2 mlrd túp aǵash egiledi.
