Osy aıda jeke sot oryndaýshysy qyzmetinen úmitker azamattardan qujat qabyldaý naýqany bastalady

Bul týraly búgin Astanada bastalǵan «Qazaqstan Respýblıkasynda jeke sot oryndaýshylary ınstıtýtyn engizý» taqyrybyndaǵy halyqaralyq semınarda QR Ádilet mınıstrligi Sot aktilerin oryndaý komıtetiniń basqarma bastyǵy Ǵalymbek Smaǵulov málim etti.

Jeke sot oryndaýshylarynyń jumysyn uıymdastyrý basqarmasyna jetekshilik etip jatqan Ǵ.Smaǵulov habarlaǵandaı, ótken jyly qabyldanǵan «QR Sot oryndaýshylarynyń mártebesi jáne atqarýshylyq is júrgizý týraly» zańǵa sáıkes elimizde jeke sot oryndaýshylary ınstıtýtyn engizý qarastyrylǵan. «Qazaqstan TMD elderi ishinde birinshi bolyp jeke sot oryndaýshylary ınstıtýtyn engizip otyr. Qazaqstandyq ınstıtýtyń negizgi ereksheligi - jeke sot oryndaýshylarynyń qyzmeti memlekettik sot oryndaýshylarymen qatar júrgizilip, osy eki sala bir-birin tolyqtyryratyn bolady. Sotqa júgingen azamattar sot oryndaýshysyn óz qalaýy boıynsha tańdaıtyn bolady. Jeke sot oryndaýshylary bolsa, taraptardyń biri memleket bolyp tabylatyn qujattardan basqa barlyq sot aktilerimen aınalysa alady», - deıdi Ǵ.Smaǵulov.

Komıtet ókili atap kórsetkendeı, naýryzdyń ekinshi jartysynan bastap QR Ádilet mınıstrligi Sot aktilerin oryndaý komıteti jeke sot oryndaýshysy qyzmetinen úmitker azamattarǵa lıtsenzııa berý boıynsha qujat qabyldaýdy bastaıdy. Qabyldaý naýqanynyń alǵashqy kezeńinde 200 lıtsenzııa berý kózdelgen. Al jyldyń aıaǵyna deıin 400 jeke sot oryndaýshysyna arnaıy ruqsat berý qaǵazdary tabystalmaq.

Aıta keteıik, zańǵa sáıkes jeke sot oryndaýshysy qyzmetinen úmitker mamandarǵa birneshe talap qoıylyp otyr. Atap aıtqanda, Qazaqstan azamattyǵynyń bolýy, 25 jasqa tolýy, biliktilik emtıhanyn tapsyrýy, bir jyldyq taǵylymdamadan ótýi, lıtsenzııa alýy jáne konkýrstyq irikteýden ótýi. Osy oraıda alǵashqy jyldary jeke sot oryndaýshylaryn besjyldyq eńbek ótili bar atqarý óndirisi qyzmetkerlerdiń, sondaı-aq on jyldyq eńbek ótili bar prokýrorlar men sýdıalardyń qatarynan alý qarastyrylǵan.