Osy aptada Saǵyntaev Pákistan astanasynda ótetin EYU sammıtine qatysady
ASTANA. QazAqparat - QR Premer-Mınıstri Baqytjan Saǵyntaev pen Qazaqstan Úkimeti músheleriniń qatysýymen 27 aqpan-4 naýryz aralyǵynda ótetin oqıǵalar ańdatpasy primeminister.kz saıtynda jarııalandy.
Osy aptada QR Premer-Mınıstri Baqytjan Saǵyntaevtyń tóraǵalyǵymen QR Úkimetiniń otyrysy ótedi. QR Prezıdenti Nursultan Nazarbaevtyń «Qazaqstannyń úshinshi jańǵyrýy. Jahandyq básekege qabilettilik» atty Qazaqstan halqyna joldaýyn iske asyrý aıasynda bilim berý salasyna ІT júıelerdi engizýdi talqylaý josparlanǵan.
Sondaı-aq, Úkimet músheleri qurylys boıynsha memlekettik satyp alýdy qazynashylyq súıemeldeýdi engizý máseleleri men 2017-2021 jyldarǵa arnalǵan QR agroónerkásip keshenin damytýdyń memlekettik baǵdarlamasyn iske asyrý boıynsha sharalar josparyn qarastyrady.
Bıyl 1 naýryzda QR Premer-Mınıstri Baqytjan Saǵyntaev Islamabad (Pákistan) qalasynda Ekonomıkalyq yntymaqtastyq uıymynyń (EYU) 13-shi sammıtiniń jumysyna qatysady. Barlyq qatysýshylar uıym qyzmetin jańa jahandyq jáne óńirlik jaǵdaılar turǵysynan qarastyrady dep josparlanǵan.
EYU - Iran, Pákistan, Túrkııa, Aýǵanstan, Ázirbaıjan, Qazaqstan, Qyrǵyzstan, Tájikstan, Túrkimenstan jáne Ózbekstan elderi kiretin eýrazııalyq saıası jáne ekonomıkalyq úkimetaralyq uıym.
Sondaı-aq, osy aptada QR Premer-Mınıstri Baqytjan Saǵyntaevtyń tóraǵalyǵymen QR Prezıdenti janyndaǵy Shetel ınvestıtsııalary keńesiniń aralyq otyrysy ótedi. Otyrys barysynda eńbek zańnamasy, adam kapıtalyn damytý, energetıka, ekologııa jáne munaıgaz salasyn damytý máseleleri qaralatyn bolady.
Qazaqstan Premer-Mınıstri Baqytjan Saǵyntaev Úkimet úıinde EQQDB vıtse-prezıdenti P. Heılbronmen, sonymen qatar Adjar AR Úkimetiniń Tóraǵasy Z. Pataradzemen halyqaralyq kezdesýler ótkizedi.
Aldaǵy aptada QR Premer-Mınıstriniń birinshi orynbasary A. Mamın EEK Úılestirý keńesiniń jáne EKSPO sharalary boıynsha uıymdastyrýshylyq komıtetiniń otyrystaryn ótkizedi. Sonymen qatar, kedendik-kóshi-qon baqylaýy, ındýstrııalyq aımaqtardy damytý jáne ákimderdiń esep berý kezdesýleriniń qorytyndysy boıynsha óńirlerdiń túıitkildi máseleleri boıynsha birqatar keńester ótkiziledi. Budan ózge, A. Mamın Nurkent qalasyn damytý josparlaryn qarastyrýǵa Almatyǵa jumys saparymen barady.
QR Premer-Mınıstriniń orynbasary - QR aýyl sharýashylyǵy mınıstri A. Myrzahmetov aldaǵy aptada AShM uıymdastyrýshylyq qurylymy, aýyl sharýashylyǵy mashınasyn qurastyrýdy damytý, QR-da balyq sharýashylyǵyn damytý máseleleri boıynsha, sonymen qatar, sý tasqyny kezeńine daıyndyq jáne kóktemgi egis jumystaryna ázirlik máseleleri boıynsha birqatar keńester ótkizedi.
Budan ózge, A. Myrzahmetov «Kampofrıo Fýd» (Ispanııa) transulttyq kompanııasynyń ókilderimen kezdesý ótkizedi jáne jumys saparymen Qaraǵandy oblysyna barady.
