Osy aptada Qaraǵandy oblysy emhanalaryna tegin antıbıotıkter kelip túsedi
QARAǴANDY. QazAqparat - Áleýmettik medıtsınalyq saqtandyrý qorynda saqtandyrylǵan naýqastarǵa tıesili tegin antıbıotıkter apta sońyna deıin Qaraǵandy oblysynyń emhanalaryna túsýi tıis. Sondaı-aq, qyrkúıek aıyna deıin óńirde bes kompıýterlik tomografııa kabınetin ashý josparlanýda. Bul týraly Saryarqa telearnasynyń tikeleı efırinde densaýlyq saqtaý basqarmasynyń basshysy Erjan Nurlybaev málimdedi dep habarlaıdy QazAqparat tilshisi.
Kelesi aptada pnevmonııa men KVI-dan úıde emdeletinder qajetti antıbıotıkti tegin ala alady. Oblys emhanalaryna 87 myń azıtromıtsın jáne 100 myńnan astam amoksıtsıllın kelip túsedi.
Qajetti dári-dármekke retseptini tirkeý orny boıynsha emhanaǵa júginý arqyly nemese DamuMed qosymshasyn paıdalaný arqyly alýǵa bolady.
Sondaı-aq, osy aptanyń sońyna deıin óńir statsıonarlaryna qajetti dári-dármek túsýi tıis.
Medıtsınalyq mekemelerde dári-dármek joqtyǵy máselesi boıynsha densaýlyq saqtaý basqarmasynyń call-ortalyǵyna 95-55-59 nómiri boıynsha habarlasýǵa bolady.
Oblysta medıtsınalyq mekemelerdi tehnıkamen qamtamasyz etý de jalǵasýda.
Qazir óńirde ÓJJ apparattarymen jabdyqtalǵan 150 reanımatsııalyq tósek bar. Taǵy 27 apparat osy aptada aýrýhanalarǵa túsedi. Osyndaı 100 qurylǵyny satyp alýǵa bıýdjetten aqsha bólindi.
Oblystyń medıtsınalyq mekemelerinde 200 ottegi kontsentraty bar. Olar naýqastardyń qanynda otteginiń qajetti deńgeıin saqtaýǵa kómektesedi. «Qazaqmys» korporatsııasy memlekettik-jekemenshik áriptestik aıasynda 200 apparat satyp alady.
Bıylǵy qyrkúıek aıyna deıin Qaraǵandy oblysynda kompıýterlik tomografııanyń bes kabıneti ashylady.
