Osy aptada «BalaTurkvizyon» baıqaýynyń Túrkııadaǵy Grand-fınalynda Qazaqstan namysyn qorǵaıtyn jeńimpaz anyqtalady
Baıqaýdyń basty maqsaty - mýzyka álemi arqyly balalardyń jan-jaqty damýyna úles qosý, respýblıkamyzdyń barlyq balabaqsha men mektepterine arnaıy syıǵa tartylatyn qazaq tilindegi jańa ánderdi jaryqqa shyǵarý jáne qazaqstandyq jas sazgerler men aqyndarǵa qoldaý kórsetý.
Aıta keteıik, 15 tamyzdan bastap «Bóbek» juldyzdy úıinde» 16 oblys pen Almaty, Astana qalalarynyń jeńimpazdary Álııa Nazarbaeva qorynyń arnaıy shaqyrýymen, balalyq shaqtyń altyn besigine aınalǵan - «Bóbek» Ulttyq ǵylymı-praktıkalyq, bilim berý jáne saýyqtyrý ortalyǵynda vokal, horeografııa, sahna jáne akterlik sheberlik boıynsha kásibı mamandardan sabaq alyp, qazaqstandyq óner maıtalmandarynan sheberlik synybyn tamashalady.
Qyrkúıektiń 19-20 kúnderi Beıbitshilik jáne kelisim saraıynda baıqaýdyń jartylaı fınaly men fınalyna arnalǵan kontsert ótedi. Balalarǵa arnalǵan jańa ánderdi barlyq kórermender men qazaqstandyq 16 estrada juldyzynan quralǵan qazylar alqasy tyńdap, 20 qyrkúıek kúni fınaldyq Gala-kontsertke joldama alatyn 8 fınalısti anyqtaıdy.
«Ulttyq irikteýdiń fınaldyq gala-kontsertinde qazylar alqasynyń tóraıymy Álııa Nazarbaeva bastaǵan Janııa Aýbakırova, Qalqaman Sarın, Renat Gaısın, Janar Duǵalova, Arman Dúısenov, Nurlan Qarajigitov, Rınat Dýmanuly qazylar alqasy irikteýdiń eń úzdik daýysyn anyqtaıdy. Jeńimpaz 2015 jyldyń jeltoqsan aıynda Túrkitildi elder arasynda tuńǵysh ótkiziletin «BalaTurkvizyon» baıqaýynda Qazaqstan namysyn qorǵaıdy», -delingen taratylǵan málimette.
21 eldiń ónerpazy baq synaıtyn Grand-fınal 2015 jyldyń 18 jeltoqsanynda Túrkııanyń Ystambul qalasynda ótedi.
Baıqaýdyń ulttyq irikteý kezeńin QR Tuńǵysh Prezıdenti - Elbasy qorynyń qoldaýymen Álııa Nazarbaevanyń «Jandaný álemi» qory uıymdastyryp otyr.
Budan buryn habarlanǵandaı. «BalaTurkvizyon-Qazaqstan» Ulttyq irikteý kezeńi 8 maýsym men 8 tamyz aralyǵynda elimizdiń barlyq aımaǵynda jáne Almaty, Astana qalalarynda ótti. Іrikteýge 2000-ǵa jýyq ónerpazdar qatysty. Ár óńirden juldyzdy tálimgerler - qazaqstan estradasynyń jas ánshileri men tanymal prodıýserleri birigip, 8 ben 13 jas aralyǵyndaǵy ónerli balalardy tańdady.
