«Ósý kapıtaly» forýmy: Batys Qazaqstanda ınvestıtsııalyq ahýal talqylandy
ORAL. KAZINFORM – Oralda BQO ákimdigi men prokýratýrasynyń uıymdastyrýymen «Ósý kapıtaly: aımaqtyń jańa múmkindikteri» atty ınvestıtsııalyq forým ótti, dep habarlady ákimniń baspasóz qyzmeti.
Mańyzdy jıynnyń maqsaty – bıznes qaýymdastyqpen ózara is-qımyldy nyǵaıtý jáne ınvestorlardyń quqyǵyn qorǵaý. Іs-sharaǵa aımaq basshysy Narıman Tóreǵalıev, oblys prokýrory Nurbek Ulasbekuly, QR Bas prokýratýrasynyń Investorlardyń quqyqtaryn qorǵaý jónindegi komıtet tóraǵasynyń orynbasary Azamat Dúısembekov, Ónerkásip komıteti tóraǵasynyń orynbasary Muhamed Andaqov jáne Óńirlik kásipkerler keńesiniń tóraǵasy Murat Jaqybaev qatysty.
Forým aımaqtaǵy oqý oryndary men irgeli kásiporyndardyń ınnovatsııalyq jobalar kórmesimen ashyldy. Onda ınvestorlar tyń bastamalaryn tanystyryp, ekonomıkalyq tıimdiligine nazar aýdartty. Resmı bólimde aımaqtyń ınvestıtsııalyq áleýeti týraly beınerolık kórsetilip, jobalardyń naqty nátıjeleri baıandaldy.
Oblys ákimi Narıman Tóreǵalıev óńirde ınvestorlardyń quqyǵyn qorǵaý jáne qolaıly ınvestıtsııalyq ahýal qalyptastyrý boıynsha keshendi is-sharalar atqarylyp jatqanyn atap ótti.
- Memleket basshysy ınvestıtsııa tartý isin júıeli jolǵa qoıyp, jobalardy ártaraptandyrý jóninde naqty tapsyrmalar berdi. Keshendi jumystar men kelissózder nátıjesinde keıingi 3 jylda óńir ekonomıkasyna 2,3 trln teńge ınvestıtsııa tartyldy. Prokýratýra organdarymen birlese otyryp, ınvestorlardyń quqyǵyn qorǵaý sharalaryn jalǵastyra beremiz. Jańa jumys oryndarynyń ashylýy turǵyndardyń tabysyn arttyryp, áleýmettik-ekonomıkalyq damýǵa serpin beredi», — dedi Narıman Tóreǵalıev.
Forýmda jylyna 100 myń tonna qoqys óńdeıtin zaýyt salý, gaztýrbınalyq elektr stansasynyń qurylysy, «Eýrazııa» logıstıkalyq habyn qurý, farmatsevtıkalyq preparattar shyǵarý sııaqty ońtústik koreıalyq, qytaılyq jáne reseılik kompanııalardyń qatysy bar iri jobalar talqylandy.
Jıyn sońynda qaldyqtardy óńdeý, energetıka, qonaq úı bıznesi jáne qus fabrıkasyn salý boıynsha yntymaqtastyq jónindegi mańyzdy memorandýmdarǵa qol qoıyldy. Qurylys, mashına jasaý, metallýrgııa jáne týrızm salalarynyń damýyna úles qosqan birqatar kompanııa basshylary arnaıy marapattarǵa ıe boldy.
