«Ostrye kozyrkı» juldyzy Astananyń keń kósheleri men adamdaryna tánti boldy

Comic Con Astana festıvalinde ótken baspasóz máslıhatynda akterden Qazaqstanda tosyn kóringen nemese mádenı alshaqtyqtar týraly suraq qoıyldy. Andersonnyń aıtýynsha, eshbir mádenı alshaqtyqty sezinbegen. Degenmen Astananyń keń kópjolaqty kósheleri men jergilikti turǵyndardyń sypaıy qarym-qatynasy erekshe nazar aýdararlyq ekenin aıtty.

– Men Ońtústik Londonnanmyn. Bul – álemniń túkpir-túkpirinen kelgen túrli ult ókilderi turatyn óte kópultty aýdan. Sondyqtan mádenı tańdanys bolǵan joq. Biraq eldiń ózi meni qatty tańǵaldyrdy, ásirese óte aýqymdy. Munda tórt-bes jolaqty óte keń kósheler bar. Buǵan deıin de aıtqanmyn: muny maqtaý retinde qabyldaısyzdar ma, bilmeımin, biraq Qazaqstan maǵan kóp jaǵynan AQSh-ty eske saldy. Shynymen de, elderińizden erekshe áser aldym, – dedi akter.

T.Andersonnyń aıtýynsha, taǵy bir erekshelik – adamdardyń bir-birimen qarym-qatynas jasaý mádenıeti. Onyń sózinshe, ózi ósken ortada adamdar áldeqaıda qatqyl sóılep, balaǵat sózderdi jıi qoldanady.

– Mundaǵy adamdar maǵan óte meıirimdi, aqjarqyn bolyp kórindi. Jalpy, bul jerde birde-bir dóreki adamdy kezdestirmedim. Bizde adamdar keıde bir-birimen agressıvti sóılesip, balaǵattasyp jatady. Muny teris maǵynada túsinbeńizder, jaı ǵana bizde solaı qalyptasqan. Al munda eshkim tipti jol-jónekeı de balaǵat sóz aıtpaıdy, – dedi ol.

Mysal retinde akter Gerı Oldman túsirgen «Ne glotat» («Nil by Mouth») fılmin eske aldy. Bul týyndy Ońtústik Londondaǵy jumysshy taptyń ómirine arnalǵan.

– Menińshe, Oldman fılmge osyndaı ataý berý arqyly belgili bir oıdy jetkizgisi kelgen. Jumysshy tap ókilderi, ásirese londondyqtar, asa baı sózdik qorymen erekshelenbeıdi. Sondyqtan biz balaǵat sózderdi jıi qoldanamyz. Qazir ol sózderdi qaıtalamaı-aq qoıaıyn, biraq shynymen solaı sóıleımiz. Al munda meni adamdar, jankúıerler jáne olardyń emotsııasy tańǵaldyrdy. Buǵan deıin eshqashan ózimdi osynshalyqty jyly qarsy alynǵan qonaq ári sonshalyqty jaıly sezingen emespin, – dedi akter.

Anderson Qazaqstanda uıymdastyrylǵan Comic Con festıvaliniń deńgeıine de joǵary baǵa berdi.

– Qazir sizder meniń aldymda otyrsyzdar jáne aıtqandaryma tánti bolyp otyrǵan shyǵarsyzdar. Biraq men bireýge unaý úshin jaı ǵana jaqsy sóz aıtatyn adamdardyń qatarynan emespin. Men týraly ne jazsańyzdar da óz erikterińiz. Men qandaı bolsam, sol qalpymdamyn, ózimdi basqa adam etip kórsetýge nemese ról oınaýǵa tyryspaımyn. Sondyqtan shyn kóńilmen aıta alamyn, bul – men qatysqan Comic Con festıvalderiniń eń úzdigi, – dedi T.Anderson.

Aıta keteıik, «Ostrye kozyrkı» serıalynda Artýr Shelbı rólin somdap, sondaı-aq The Revenant («Vyjıvshıı»), Legend («Legenda») jáne Sherlock Holmes: A Game of Shadows («Sherlok Holms: Igra teneı») fılmderi arqyly tanylǵan brıtandyq akter Pol Anderson Comic Con Astana festıvaliniń basty hedlaınerleriniń biri boldy.

Aıta keteıik, Comic Con Astana 9 tamyzǵa deıin jalǵasady. Festıval bastalǵan alǵashqy kúni is-sharaǵa 16 myń adam qatysqan.