Osteopattardyń jelidegi jarnamasyna baqylaý bar ma – mınıstrlik túsindirdi
ASTANA. KAZINFORM – Áleýmettik jelide túrli aýrýlardy emdeýdi, sondaı-aq balanyń densaýlyǵy men damýyn jaqsartýdy usynatyn osteopattardyń jarnamasynan kóz súrinedi. Mundaı jarnamalar qanshalyqty baqylanady? Bul týraly Kazinform saýalyna QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti tóraǵasynyń orynbasary Jandos Ádilhan jaýap berdi.
Komıtettiń málimetinshe, ınternette zańmen tyıym salynǵan aqparat anyqtalsa, ony joıý boıynsha tıisti sharalar qabyldanady. Bul tártip ınternet-resýrstarǵa ǵana emes, sheteldik onlaın-platformalar men messendjerlerge de qatysty.
– Atap aıtqanda, zańǵa qaıshy aqparat anyqtalǵan jaǵdaıda úsh jumys kúni ishinde onlaın-platforma nemese messendjer ákimshiligine ony joıý týraly habarlama jiberiledi. Máselen, 2025 jyly ınternet-resýrstarǵa, blogerlerge jáne QR Mádenıet jáne aqparat mınıstrligine aqparatty joıý qajettiligi týraly 20-dan astam aqparattyq hat jiberildi. 2026 jyly 142 ınternet-resýrsqa qoljetimdilikti shekteý jóninde málimet joldandy, - dedi Jandos Ádilhan.
Bul rette komıtet jaýabynda atalǵan hattar men 142 ınternet-resýrstyń qanshasy osteopattardyń jarnamasyna qatysty ekeni naqtylanbaǵan.
Osteopatııalyq qyzmetke qatysty shaǵymdar men patsıent densaýlyǵyna zııan keltirý jaǵdaılary boıynsha da jeke esep júrgizilmeıdi. Sondyqtan sońǵy bes jylda mundaı qyzmetke qatysty qansha shaǵym túskeni nemese asqyný faktileri bolǵany jóninde bólek derek joq.
– Al jalpy medıtsınalyq qyzmetter boıynsha 2021–2025 jyldary 4 197 ákimshilik hattama toltyryldy. Sertıfıkatsyz nemese lıtsenzııasyz zańsyz medıtsınalyq jáne farmatsevtıkalyq qyzmetpen aınalysqany úshin Ákimshilik quqyq buzýshylyq týraly kodekstiń 424-baby boıynsha aıyppul qarastyrylǵan, - dedi komıtet tóraǵasynyń orynbasary.
Eske salaıyq, buǵan deıin Densaýlyq saqtaý mınıstrligi osteopatııany balalardaǵy gıpertonýs, sóıleý damýynyń kesheýildeýi men bosaný jaraqattarynyń saldaryn emdeýde tıimdiligi men qaýipsizdigi dáleldengen derbes medıtsınalyq ádis retinde qarastyrmaıtynyn habarlaǵan. Balalarǵa medıtsınalyq kómek kórsetý kezinde dáleldi medıtsınaǵa negizdelgen klınıkalyq hattamalar men usynymdar qoldanylady.
