Osteopatııa: emdeý ádisiniń tıimdiligi men qyzmetine qoıylatyn talaptar
ASTANA. KAZINFORM - Sońǵy jyldary osteopat qyzmetine júginetinder kóbeıip keledi. Ásirese ata-analar balanyń gıpertonýsy, bas súıeginiń pishini, sóıleý damýynyń kesheýildeýi sııaqty máselelerge baılanysty mundaı mamandardyń kómegine júginedi. Alaıda Qazaqstanda osteopatııa medıtsınalyq qyzmet retinde tanyla ma, onyń tıimdiligi ǵylymı turǵyda dáleldengen be jáne maman tańdaǵanda neni eskerý qajet? Kazinform tilshisi osy saýaldarǵa jaýap izdep kórdi.
Osteopattardyń qyzmeti qalaı retteledi
QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti tóraǵasynyń orynbasary Jandos Ádilhannyń málimetinshe, Qazaqstanda medıtsınalyq qyzmetpen tek kásiptik medıtsınalyq bilimi bar tulǵalar aınalysa alady. Al dástúrli medıtsına salasynda qyzmet kórsetý úshin mamannyń medıtsınalyq bilimi, klınıkalyq praktıkaǵa jiberýge arnalǵan tıisti sertıfıkaty jáne medıtsınalyq qyzmetke lıtsenzııasy bolýy qajet.
– Dástúrli medıtsına salasyndaǵy qyzmet lıtsenzııalanady. Oǵan gomeopatııa, gırýdoterapııa, manýaldy terapııa, refleksoterapııa, fıtoterapııa jáne tabıǵı tekti quraldarmen emdeý baǵyttary kiredi. Bul qyzmet eresekter men balalarǵa ambýlatorııalyq, statsıonarlyq jáne statsıonardy almastyratyn kómek aıasynda kórsetilýi múmkin, -dedi ol.
Spıkerdiń málimetinshe, osy baǵyttarda jumys isteıtin medıtsına qyzmetkeriniń «Dástúrli terapııa» jáne «Dástúrli medıtsına» mamandyǵy boıynsha klınıkalyq praktıkaǵa jiberýge arnalǵan sertıfıkaty bolýy tıis. «Dástúrli terapııa» mamandyǵyna refleksoterapııa, manýaldy terapııa, sý-djok terapııasy, gomeopatııa, gırýdoterapııa jáne fıtoterapııa kiredi.
Al osteopatııaǵa qatysty talap ózgeshe.
– Osteopatııa medıtsınalyq qyzmet bolyp sanalmaıdy, osyǵan baılanysty jáne joǵaryda aıtylǵandardyń negizinde mamandardy sertıfıkattaý jáne bul qyzmetti lıtsenzııalaý júzege asyrylmaıdy, – dedi Jandos Ádilhan.
Komıtet halyq emshileriniń qyzmetine qatysty da túsinikteme berdi. Medıtsınalyq bilimi joq halyq emshileriniń qyzmeti de lıtsenzııalanbaıdy jáne olardy klınıkalyq praktıkaǵa jiberý úshin sertıfıkattaý júrgizilmeıdi. Medıtsınalyq jáne farmatsevtıkalyq baqylaý komıteti óz quzyreti aıasynda tek medıtsına qyzmetkerleriniń qyzmetin baqylaıdy.
– Sonymen qatar tıisti maman sertıfıkatynsyz medıtsınalyq qyzmetpen aınalysýǵa tyıym salynady. Sertıfıkaty nemese lıtsenzııasy joq adamnyń zańsyz medıtsınalyq nemese farmatsevtıkalyq qyzmetpen aınalysýy ákimshilik jaýapkershilikke ákep soǵady. Ákimshilik quqyq buzýshylyq týraly kodekstiń 424-babyna sáıkes, mundaı jaǵdaıda jeke tulǵalarǵa – 5 AEK, laýazymdy tulǵalarǵa – 15 AEK, shaǵyn kásipkerlik sýbektilerine – 20 AEK, orta kásipkerlik sýbektilerine – 50 AEK, iri kásipkerlik sýbektilerine 70 AEK kóleminde aıyppul qarastyrylǵan, - dedi komıtet tóraǵasynyń orynbasary.
Budan bólek, spıker Densaýlyq saqtaý kodeksiniń 132-babyna sáıkes eki jáne odan da kóp adamdy tarta otyryp, onyń ishinde mass-medıany paıdalaný arqyly emshilik seanstaryn ótkizýge tyıym salynatynyn da eske salyp ótti.
Osteopat dáriger belgilegen emdeý sharasyn almastyra ala ma
Osteopatqa júgingisi kelgen adam mamannyń medıtsınalyq bilimi men klınıkalyq praktıkaǵa quqyǵyna nazar aýdarýy kerek. QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti tóraǵasynyń orynbasary Jandos Ádilhannyń aıtýynsha, osteopat qyzmeti dáriger keńesi men taǵaıyndalǵan emdi almastyrmaýy tıis ekenin aıtty.
– Maman tańdaǵanda onyń medıtsınalyq bilimine, qoldanystaǵy sertıfıkatyna, klınıkalyq praktıkaǵa quqyǵyna jáne qoldanatyn ádisterine nazar aýdarǵan jón. Sondaı-aq qyzmet kórsetiletin uıymnyń lıtsenzııasyn tekserýge bolady. Memlekettik lıtsenzııalar týraly aqparat E-license derekter bazasynda ashyq qoljetimdi, - dedi ol.
Sondaı-aq spıker tıisti medıtsınalyq mamandyǵy joq adamǵa júginý aýrýdy der kezinde anyqtaýǵa kedergi keltirýi múmkin ekenin atap ótti.
– Tıisti medıtsınalyq mamandyǵy men klınıkalyq praktıkaǵa quqyǵy joq tulǵaǵa júgingende aýrýdy ýaqtyly anyqtamaý jáne emdi kesh bastaý táýekeli bar. Onyń aldyn alý úshin shaǵymdar bolǵan jaǵdaıda tıisti profıldi dárigerge ýaqtyly júginý, lıtsenzııasy bar medıtsınalyq uıymdarda tekserýden ótý usynylady, – dedi ol.
Sondyqtan mınıstrlik dáleldi bazasy joq ádisterge júgingenniń ózinde dáriger taǵaıyndaǵan emdi toqtatpaýǵa nemese keıinge qaldyrmaýǵa keńes beredi.
Osteopatııa gıpertonýs, bala tiliniń kesh shyǵýy kezinde kómektese me
Qazir kóptegen ata-ana balanyń bulshyqet tonýsynyń buzylýy, tiliniń kesh shyǵýy nemese bas súıeginiń pishinine qatysty máseleler týyndaǵanda osteopat kómegine júginedi. Áleýmettik jelilerde de mundaı mamandardyń sábıdiń gıpertonýsyn, plagıotsefalııany, sóıleý damýynyń kesheýildeýin, tipti bosaný jaraqatynyń saldaryn emdeýge kómektesetini týraly jarnama az emes.
Alaıda osteopatııanyń mundaı jaǵdaılardy emdeýdegi tıimdiligi qanshalyqty dáleldengen? Komıtet tóraǵasynyń orynbasary Jandos Ádilhannyń málimetinshe, resmı medıtsınada mundaı jaǵdaılar ǵylymı negizdelgen emdeý ádisi retinde tanylmaıdy.
– Mınıstrlik osteopatııalyq qyzmettiń náresteler men balalardaǵy gıpertonýs, plagıotsefalııa, sóıleý damýynyń kesheýildeýi, bosaný jaraqatynyń saldary sııaqty jaǵdaılardy emdeýdegi tıimdiligin ǵylymı dáleldengen medıtsınalyq ádis retinde moıyndamaıdy. Sondaı-aq ony qaýipsizdigi dáleldengen derbes medıtsınalyq ádis dep eseptemeıdi. Balalarǵa medıtsınalyq kómek kórsetý kezinde dáleldi medıtsına prıntsıpterine negizdelgen klınıkalyq hattamalar men usynymdar qoldanylady, - dedi Jandos Ádilhan.
Sonymen qosa ol Qazaqstanda osteopatııanyń tıimdiligi men qaýipsizdigine memlekettik baǵalaý júrgizilgen-júrgizilmegenin de túsindirip ótti.
– Osteopatııa medıtsınalyq mamandyqtar júıesine kirmeıtindikten, mınıstrlikte onyń tıimdiligi men qaýipsizdigin rastaıtyn memlekettik baǵalaý júrgizilgeni týraly málimet joq. Budan bólek, joǵary oqý ornynan keıingi medıtsınalyq bilim berý júıesinde osteopatııa boıynsha biliktilikti arttyrý baǵdarlamalary qarastyrylmaǵan, - dedi spıker.
Osteopattardyń jelidegi jarnamasy qalaı baqylanady
Áleýmettik jelide túrli aýrýlardy emdeýdi, sondaı-aq balanyń densaýlyǵy men damýyn jaqsartýdy usynatyn osteopattardyń jarnamasynan kóz súrinedi. Mundaı jarnamalar qanshalyqty baqylanady? QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti tóraǵasynyń orynbasary Jandos Ádilhannyń málimetinshe, ınternette zańmen tyıym salynǵan aqparat anyqtalsa, ony joıý boıynsha tıisti sharalar qabyldanady. Bul tártip ınternet-resýrstarǵa ǵana emes, sheteldik onlaın-platformalar men messendjerlerge de qatysty.
– Atap aıtqanda, zańǵa qaıshy aqparat anyqtalǵan jaǵdaıda úsh jumys kúni ishinde onlaın-platforma nemese messendjer ákimshiligine ony joıý týraly habarlama jiberiledi. Máselen, 2025 jyly ınternet-resýrstarǵa, blogerlerge jáne QR Mádenıet jáne aqparat mınıstrligine aqparatty joıý qajettiligi týraly 20-dan astam aqparattyq hat jiberildi. 2026 jyly 142 ınternet-resýrsqa qoljetimdilikti shekteý jóninde málimet joldandy, - dedi Jandos Ádilhan.
Bul rette komıtet jaýabynda atalǵan hattar men 142 ınternet-resýrstyń qanshasy osteopattardyń jarnamasyna qatysty ekeni naqtylanbaǵan.
Osteopatııalyq qyzmetke qatysty shaǵymdar men patsıent densaýlyǵyna zııan keltirý jaǵdaılary boıynsha da jeke esep júrgizilmeıdi. Sondyqtan sońǵy bes jylda mundaı qyzmetke qatysty qansha shaǵym túskeni nemese asqyný faktileri bolǵany jóninde bólek derek joq.
– Al jalpy medıtsınalyq qyzmetter boıynsha 2021–2025 jyldary 4 197 ákimshilik hattama toltyryldy. Sertıfıkatsyz nemese lıtsenzııasyz zańsyz medıtsınalyq jáne farmatsevtıkalyq qyzmetpen aınalysqany úshin Ákimshilik quqyq buzýshylyq týraly kodekstiń 424-baby boıynsha aıyppul qarastyrylǵan, - dedi komıtet tóraǵasynyń orynbasary.
Sonymen qatar ol azamattardyń ótinishteri Komıtet pen onyń aýmaqtyq departamentteriniń emshiler men dástúrli medıtsına mamandarynyń qyzmetine jospardan tys tekserý júrgizýine negiz bola alatynyn atap ótti. Onyń sózinshe, emshilik ádisterin qoldaný kezinde adam densaýlyǵyna zııan keltirilse, qyzmet kórsetken tulǵa Qazaqstan zańnamasyna sáıkes jaýapqa tartylady.
