Osteopat dáriger belgilegen emdeý sharasyn almastyra ala ma
ASTANA. KAZINFORM – Osteopatqa júgingisi kelgen adam mamannyń medıtsınalyq bilimi men klınıkalyq praktıkaǵa quqyǵyna nazar aýdarýy kerek. QR Densaýlyq saqtaý mınıstrligi Kazinform saýalyna bergen jaýabynda maman tańdaǵanda neni tekserý qajettigin túsindirdi.
Medıtsınalyq jáne farmatsevtıkalyq baqylaý komıteti tóraǵasynyń orynbasary Jandos Ádilhannyń aıtýynsha, osteopat qyzmeti dáriger keńesi men taǵaıyndalǵan emdi almastyrmaýy tıis.
– Maman tańdaǵanda onyń medıtsınalyq bilimine, qoldanystaǵy sertıfıkatyna, klınıkalyq praktıkaǵa quqyǵyna jáne qoldanatyn ádisterine nazar aýdarǵan jón. Sondaı-aq qyzmet kórsetiletin uıymnyń lıtsenzııasyn tekserýge bolady. Memlekettik lıtsenzııalar týraly aqparat E-license derekter bazasynda ashyq qoljetimdi, - dedi ol.
Sondaı-aq spıker tıisti medıtsınalyq mamandyǵy joq adamǵa júginý aýrýdy der kezinde anyqtaýǵa kedergi keltirýi múmkin ekenin atap ótti.
– Tıisti medıtsınalyq mamandyǵy men klınıkalyq praktıkaǵa quqyǵy joq tulǵaǵa júgingende aýrýdy ýaqtyly anyqtamaý jáne emdi kesh bastaý táýekeli bar. Onyń aldyn alý úshin shaǵymdar bolǵan jaǵdaıda tıisti profıldi dárigerge ýaqtyly júginý, lıtsenzııasy bar medıtsınalyq uıymdarda tekserýden ótý usynylady, – dedi ol.
Sondyqtan mınıstrlik dáleldi bazasy joq ádisterge júgingenniń ózinde dáriger taǵaıyndaǵan emdi toqtatpaýǵa nemese keıinge qaldyrmaýǵa keńes beredi.
Buǵan deıin komıtet Qazaqstanda osteopatııa medıtsınalyq qyzmet bolyp sanalmaıtynyn habarlaǵan. Osyǵan baılanysty osteopatııa boıynsha mamandardy sertıfıkattaý jáne bul qyzmetti lıtsenzııalaý júrgizilmeıdi.
Osteopatııa medıtsınalyq mamandyqtar júıesine de kirmeıdi. Mınıstrlikte onyń tıimdiligi men qaýipsizdigin rastaıtyn memlekettik baǵalaý júrgizilgeni týraly málimet joq. Sondaı-aq joǵary oqý ornynan keıingi medıtsınalyq bilim berý júıesinde osteopatııa boıynsha biliktilikti arttyrý baǵdarlamalary qarastyrylmaǵan.
