Osman ımperııasynyń jádigerlerin jınaǵan kitaphana ashyldy
ASTANA. 11 qyrkúıek. QazAqparat - Ystambul qalasyndaǵy Topqapy saraıynda túrik elinde teńdesi joq kitaphananyń tusaýkeser rásimi bolyp ótti. Bul jaıynda timeturk.com basylymy habarlaǵan bolatyn.
Sórelerine sonaý Osman ımperııasy zamanyndaǵy kóne kitaptardy jıystyrǵan atalmysh kitaphana osydan alty jyl buryn jóndeý jumystaryna jabylǵan bolatyn. Muslim.kz saıtynyń jazýynsha, búginde týrıster úshin esigi aıqara ashylǵan keremet kitaphananyń qorynda qolmen jazylǵan kóne jádigerlerdiń uzyn sany -18 myń 622. Sondaı-aq, bul kitaptardyń barlyǵy da túpnusqa ekendigin aıta ketkenimiz jón.
Saltanatty sharaǵa qatysqan mádenıet jáne týrızm mınıstri Ómir Cheliktiń málimdeýinshe, sonaý alys zamandardan syr shertetin qoljazba kitaptarǵa qarap, sol kezdegi túrik eliniń mádenıeti men ádebıeti qanshalyqty joǵary bolǵanyn bile alamyz. «Bizdiń arǵy ata-babalarymyzdyń ataqty ımperııasynyń tek qantógis pen joryqtan quralmaǵanyn, mádenıet pen ǵylymnyń, ádebıettiń de damýyna zor úles qosqanyn maqtanyshpen aıtýymyz kerek», - dedi mınıstr óz sózinde.
