Osloǵa Eýropanyń «jasyl» astanasy ataǵy berildi
OSLO. QazAqparat - Oslo qalasynyń merııasy ornalasqan keńsede Norvegııa astanasyna Eýropanyń «jasyl» astanasy ataǵyn berý rásimi ótti. Bul týraly QazAqparat tilshisi habarlaıdy.
Saltanatty sharaǵa Norvegııa úkimeti men koroldik otbasynyń músheleri, saıası partııalar men úkimettik emes uıymdardyń, dıplomatııalyq korpýstyń ókilderi qatysty. Onyń barysynda Oslonyń basqarýshy meri Raımond Iohanson qala turǵyndarynyń shahar ekologııasyna qosqan úlesin joǵary baǵalady.
«Bul bizdiń qolymyzdan keldi. Endi barlyǵy - sheneýnikter, iskerlik orta, qarapaıym qala turǵyndary, uıymdar men basqalary osy múmkindikti qoldanýlary tıis. Bizge úlken jaýapkershilik artyldy», - dep atap ótti Eýropanyń «jasyl» astanasy atanǵan qalanyń basshysy.
Onyń aıtýynsha, bul ataqty ıelený ońaıǵa soqpaǵan, sebebi básekelestik joǵary bolǵan.
«Biz ózge 12 qalamen synǵa tústik. Aýa sapasyn, energııa tutynýdy jáne ekologııalyq ınnovatsııany qosqanda túrli ekologııalyq ólshem dárejeleri bar», - dedi Raımond Iohanson.
Shara kezinde qorshaǵan orta, balyq aýlaý jáne teńiz isteri boıynsha Eýrokomıssııa komıssary Karmený Vella European Green Capital Award nagradasyn resmı túrde tabys etti.
Avtory Áltaıyr Ámirǵalı
