Osloda ótken assambleıada Qazaqstannyń bırjalyq tájirıbesi usynyldy

ASTANA. KAZINFORM — 18-20 maýsym kúnderi Norvegııa astanasy Osloda Eýropalyq energetıkalyq bırjalar qaýymdastyǵynyń (EUROPEX) Bas assambleıasy ótti.

Bul is-sharaǵa Qazaqstan atynan delegatsııa qatysyp, ulttyq bırjalyq saýda tájirıbesimen tanystyrdy.

Forýmǵa EUROPEX qaýymdastyǵyna múshe 33 eýropalyq bırja basshylary, Eýropalyq komıssııa men retteýshi organdardyń ókilderi, sondaı-aq energetıka, klımat jáne bırjalyq ınfraqurylym salasyndaǵy sarapshylar jınaldy. Assambleıa aıasynda qaýymdastyq tóraǵasy men dırektorlar keńesiniń músheleri saılanyp, salalyq jumys toptarynyń quramy jańartyldy.

Sonymen qatar naryqty ıntegratsııalaý, tsıfrlyq transformatsııa jáne kıberqaýipsizdik máseleleri keńinen talqylandy.

Plenarlyq otyrysta Qazaqstan delegatsııasy eldegi bırjalyq saýdanyń damýy men tájirıbesin usynyp, EUROPEX-pen aradaǵy uzaq merzimdi áriptestiktiń strategııalyq baǵyttaryn atap ótti. El atynan baıandama jasaǵan «Kaspıı» taýar bırjasynyń prezıdenti Murat Qadısov Eýropa elderimen transshekaralyq kómirtegi kvotalary saýdasyn damytý, tsıfrlyq ınfraqurylym men quqyqtyq standarttardy jetildirý boıynsha yntymaqtastyqtyń áleýetine toqtaldy.

2024 jyldan bastap «Kaspıı» bırjasy EUROPEX qaýymdastyǵyna Ortalyq Azııa elderiniń arasynan alǵashqy qaýymdastyrylǵan múshe retinde qabyldandy. Bul Qazaqstannyń halyqaralyq energetıkalyq, ekologııalyq jáne saýda naryqtaryndaǵy belsendi ustanymyn kórsetedi.

Assambleıa aıasyndaǵy kezdesýler Qazaqstan men Eýropa elderi arasynda ekijaqty baılanystardy keńeıtýge jol ashty. Norvegııamen memleketaralyq yntymaqtastyqty nyǵaıtý baǵytynda naqty usynystar aıtylyp, jańa kelisimderge negiz qalandy.

Jıyn qorytyndysy Qazaqstan Prezıdentiniń dekarbonızatsııa, tsıfrlandyrý jáne zamanaýı naryqtyq ınstıtýttardy damytý jónindegi strategııalyq mindetterimen úılesedi.

Aıta keteıik, qazaqstandyq taýar bırjasynda kúkirt saýdasy bastaldy.