Oslo – álemdegi eń «jasyl» qala

ASTANA. KAZINFORM — Norvegııa astanasy Oslo Ulybrıtanııadaǵy eń iri krýızdik kompanııalardyń biri Iglu Cruise nusqasy boıynsha álemniń eń jasyl qalalary reıtınginde birinshi orynǵa shyqty. 

AZERTADJ agenttiginiń habarlaýynsha, «jasyl ındeks» jasalǵan kezde jasyl aımaqtardyń úlesi, qoǵamdyq saıabaqtardyń sany jáne aýa sapasy eskerilgen.

Qala 100 múmkin baldyń 77,3-in jınaǵan.

Buǵan aýanyń joǵary tazalyǵy jáne turǵyndardyń 95 paıyzynyń jasyl aımaqtarǵa jaıaý jetý múmkindigi áser etken.

Ekinshi orynda – Vılnıýs (72,3 ball). Lıtva astanasynyń 61 paıyzy jasyl aımaqtarǵa tıesili, sondaı-aq munda shamamen 1,5 myń shaqyrym jaıaý jáne velosıped joldary bar.

Úzdik ondyqqa Helsınkı, Vena, Kanberra, Sıdneı, Stokgolm, Sıngapýr, Redıng jáne Mıýnhen kirdi.

Sarapshylar tabıǵı týrızmge qyzyǵýshylyq artyp kele jatqanyn aıtady. Qazirgi tańda saıahatshylar qalalyq ómir men tabıǵatqa qoljetimdilikti qatar usynatyn baǵyttardy jıi tańdaıdy.

Norvegııanyń týrıstik salasy ókilderiniń pikirinshe, mundaı reıtıng Oslonyń ekologııalyq ári turaqty qala retindegi halyqaralyq ımıdjin nyǵaıtady. Sońǵy jyldary qalada týrıster aǵyny ósip, qonaq úılerdiń tolymdylyǵy rekordtyq deńgeıge jetken. 

Aıta ketelik Almatyda 2030 jyly ár turǵynǵa 15 sharshy metr jasyl jelek bolady.