Óskenbaev ımportty almastyratyn otandyq ónimniń 3 pozıtsııasyn atady

NUR-SULTAN. QazAqparat – Elimizde ımportty almastyrýǵa daıyn taýarlar bar. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes óńdeý ónerkásibin damytýdyń qazirgi múmkindikteri men perspektıvalaryna taldaý júrgizildi. Taldaý barysynda naryqtaǵy ımportty daıyn ónimmen almastyrýǵa jáne eksporttyq áleýetti arttyrý perspektıvasyna basa nazar aýdaryldy. Sonymen birge shıkizat bazasynyń bolýy, ekologııalyq retteý, kadrlyq quzyretter men ınfraqurylym sııaqty aspektiler eskerildi. Importqa táýeldilik deńgeıin barynsha tómendetý úshin tıimdi jumys júrgizgen basqa elderdiń tájirıbesin eskerdik. Olardyń negizgi baǵdarlamalary men el ishindegi qundylyq strategııalaryn zerdeledik», - dedi ol.

Mınıstrdiń aıtýynsha, osylaısha taýar pozıtsııalary boıynsha 3 top anyqtalǵan.

«Birinshi top - ımportty almastyrýǵa daıyn taýarlar. Qazirgi tańda elimiz boıynsha mundaı taýarlardyń óndirisi bar. Tek taýar óndirýshilerge shıkizat, qarjylandyrý, qajet mamandar jáne uzaq merzimdi kelisimsharttarmen qamtamasyz etý boıynsha tıisti jumys júrgizý qajet. Ekinshi top - ımportty almastyrýǵa daıyndyq deńgeıi ortasha taýarlar. Bul jerde qajet óndiristerdi iske qosý úshin quzyret jetkilikti jáne ınvestorlar daıyn. Bizdiń tarapymyzdan jobalardy nátıjeli iske asyrý úshin qoldaý kórsetiletin bolady. Úshinshi top - ımportty almastyrýǵa qatysty daıyndyǵy tómen taýarlar. Negizinde, bul joǵary tehnologııalyq taýarlar. Olardyń óndirisi úshin bolashaqqa degen perspektıvamen jaǵdaı jasaý qajet», - dedi Qaıyrbek Óskenbaev.