Óskemenniń kóterme bazarynda kókónis baǵasyn negizsiz ósirý faktileri anyqtaldy
ASTANA. KAZINFORM – «Dına» kóterme bazaryna júrgizilgen keshendi monıtorıng nátıjesinde jeke kásipkerlerdiń biri áleýmettik mańyzy bar azyq-túlik taýarlarynyń baǵasyn negizsiz ósirgeni anyqtaldy. Bul týraly Saýda jáne ıntegratsııa mınıstrligi habarlady.
Elektrondyq shot-faktýralarǵa (EShF) júrgizilgen taldaý sábiz, kartop jáne qyryqqabatqa qosylǵan ústeme baǵanyń ruqsat etilgen normadan birneshe ese asyp ketkenin kórsetti.
Sábiz: Pavlodar oblysynyń sharýa qojalyqtarynan 170 teńge/kg baǵasymen satyp alynyp, keıin basqa kásipkerlerge 35%-ǵa deıingi ústememen (230 teńgege deıin) qaıta satylǵan.
Kartop: Aqpan aıynda Abaı oblysynan 150 teńge/kg baǵasymen 30 tonnadan astam ónim satyp alynǵan. Naýryz aıynda bul kartop Óskemende 250-den 280 teńgege deıingi baǵamen satylǵan. Naqty ústeme baǵa 70%-dan 86%-ǵa deıin jetken.
Qyryqqabat: Aýyl sharýashylyǵy taýar óndirýshilerinen 130 teńge/kg baǵamen satyp alynyp, 200–220 teńgeden ótkizilgen. Ústeme baǵa 53%-dan 69%-ǵa deıin quraǵan.
Atalǵan kókónister keıinnen qosymsha ústeme baǵamen qalanyń «úı mańyndaǵy» dúkenderinde halyqqa satylǵan.
Bul faktiler boıynsha materıaldar Óńirlik komıssııa otyrysynda qaraldy. Qazirgi ýaqytta jeke kásipkerge qatysty jospardan tys tekserý júrgizý úshin qujattar daıyndalýda. Zań buzýshylyq rastalǵan jaǵdaıda kásipker ákimshilik jaýapkershilikke tartylyp, kókónis baǵasyn tómendetý týraly nusqama beriledi.
ShQO boıynsha Saýda departamenti eskertedi: zańnamaǵa sáıkes, áleýmettik mańyzy bar azyq-túlik taýarlaryna (ÁMAT) qosylatyn shekti saýda ústemesi 15%-dan aspaýy tıis.
Eske sala keteıik, buǵan deıin ShQO-da qaraqumyq pen qanttyń baǵasyn negizsiz ósirgen kásipker ákimshilik jaýapqa tartylǵanyn jazǵan edik.
