Óskemenniń eski shaǵynaýdandaryna jańa mektep nege salynbaı keledi

ÓSKEMEN. KAZINFORM – Óskemen qalasynyń eski shaǵynaýdandarynda jańa mektep salýǵa bos jer telimderi joq.

ShQO ákimdiginiń málimetinshe, qalanyń eski bóligindegi mektepterde aýqymdy qaıta jańǵyrtý jumystary júrgizilmek. Bul shaǵyn aýdandarda bos jer telimderiniń bolmaýyna baılanysty jańa bilim ordalaryn salý múmkindigi joq. Sondyqtan bar mektepterdi jańartý - eń tıimdi sheshim bolyp otyr.

Osylaısha, mektepter jańa jabdyqtarmen qamtamasyz etilip, aýlalary abattandyrylady.

Sondaı-aq erekshe bilim berýdi qajet etetin balalarǵa arnalǵan kedergisiz orta qurylmaq.

- Óskemenniń eski bóligindegi mektepter tarıhı kelbetin saqtaıdy. Alaıda ishki jaǵy tolyq jańaryp, zamanaýı ári yńǵaıly bolady. Biz balalardyń qaı shaǵynaýdanda turatynyna qaramastan, bári birdeı jaqsy jaǵdaıda bilim alýyn qalaımyz, - dedi oblys ákimi Nurymbet Saqtaǵanov.

Óskemen qalalyq Bilim bóliminiń dereginshe, qalada 1975 jylǵa deıin salynǵan 37 mektep bar, olardyń árqaısysyna 50 jyldan asa ýaqyt bolǵan. Sonymen qatar 40 jyldan astam ýaqyt buryn salynǵan 6 mektep jáne 30 jyldan asqan 8 mektep bar. Tek sońǵy on jylda ǵana 8 jańa mektep salynsa, onyń tórteýi bıyl boı kóterdi.

Jobaǵa iri kásip ıelerin de tartý kózdelgen. Kásiporyndarǵa mektepterdegi jańǵyrtý jumystaryna qarjy bólý usynylady.

Eski shaǵynaýdandardyń turǵyndary bul bastamany qoldaıtynyn jetkizdi.

- Balalarymyzdyń jaryq kabınetterde, sapaly jıhazben jabdyqtalǵan synyptarda oqyǵanyn tileımiz. Zamanaýı sportzaly men kitaphanasy bolsa, tipten jaqsy, - deıdi qala turǵyny, eki balanyń anasy Marına Korobıhına.

Eske salsaq, osyǵan deıin Shyǵys Qazaqstanda jańa oqý jylynda qansha mektep ashylatyndyǵyn jazǵanbyz.