Óskemenniń jańa aýdanynda 114 turǵyn úı salynady
Muhtar Qul-Muhammed Óskemen qalasynda kezekte turǵan azamattar úshin salynyp jatqan turǵyn úıdiń qurylys sapasyn tekserip, «Damý» qory arqyly qarjylandyrylǵan «Sılýmın-Vostok» kásipornynyń eńbek ujymymen kezdesti. Sondaı-aq, partııanyń oblystyq aktıvimen kezdesip, Elbasy aıqyndap bergen basym baǵyttardy júzege asyrýdyń joldaryn talqylady.
Jalpy Óskemen qalasyndaǵy 19-shaǵyn aýdanda 2021 jylǵa deıin 144 turǵyn úı salý josparlanyp otyr. Sonyń nátıjesinde jalpy aýdany 876 myń sharshy metrdi quraıtyn 14327 páter halyq ıgiligine berilmek. Oblys ortalyǵynda mundaı aýqymdaǵy qurylys jumystaryn júrgizýge Elbasynyń bastamasymen qolǵa alynǵan jańa memlekettik baǵdarlamanyń arqasynda múmkindik týyp otyr. Atalǵan turǵyn úılerge kommýnıkatsııa júrgizý úshin tek «Nurly jol» baǵdarlamasy boıynsha óńirge 9 mlrd. teńgeden astam qarjyt bólingen.
Muhtar Qul-Muhammed Shyǵys Qazaqstan oblysynyń ákimi Danıal Ahmetovpen birge atalǵan úılerdiń qurylys jumystarymen arnaıy tanysty. Bolashaqta bul aýdanda Óskemen qalasynyń sol jaǵalaýynyń ortalyǵyn qurý kózdelýde. Qazirdiń ózinde munda turǵyn úılerden bólek, oblystyq sot, prokýratýra, qan ortalyǵy, 1000 oryndyq orta mektep, balabaqsha jáne dzıýdo ortalyǵynyń ǵımarattary paıdalanýǵa berilgen.
Sondaı-aq, Óskemen qalalyq ákimdigi qurylys bóliminiń basshysy Baýyrjan Qudııarovtyń aıtýynsha, keleshekte bul aýdanda ákimdik ǵımaratyn, sport keshenin, kınoteatr, stýdentter qalashyǵyn, qazaq drama teatryn jáne qazirgi zamanǵy saýda ortalyǵyn salý josparlanyp otyr.
«Elbasynyń «Nurly jol», «Nurly jer» baǵdarlamalary boıynsha Shyǵys Qazaqstan oblysyna búginniń ózinde 150 mlrd. teńgeden astam qarjy bólindi. Qazir biz turǵan jerde 144 turǵyn úı salynyp, myńdaǵan adam páterge ıe bolady. Mundaı keń kólemdegi turǵyn úı qurylysy Óskemende eshqashan bolǵan emes. Osynyń bári Elbasymyzdyń Shyǵys Qazaqstan halqyna jasaǵan erekshe qamqorlyǵynyń arqasy», - dep atap ótti Muhtar Qul-Muhammed.
Sońǵy jeti aıda Shyǵys Qazaqstan oblysynda óndirilgen ónerkásip ónimderiniń kólemi 845 mlrd. teńgeden asty. Úshinshi jańǵyrý baǵdarlamasy aıasynda qarqyndy jumys istep turǵan kásiporyndardyń qatarynda «Sılýmın-Vostok» JShS da bar. Bul jerde sorǵysh qondyrǵylary, qubyr jelisine arnalǵan armatýralar jáne kez kelgen jumysqa qoldanýǵa bolatyn elektrotehnıkalyq buıymdar daıyndalady. Taıaýda atalǵan ónerkásip orny «Damý» qory arqyly 213,5 mln. teńge kóleminde tıimdi nesıe alǵan. Bul qarjy jańa qondyrǵylar satyp alýǵa jumsaldy. Memleket tarapynan jasalǵan osyndaı qoldaýdyń arqasynda shyǵysqazaqstandyq kásipkerler Ortalyq Azııa men Reseı naryǵyna shyǵýǵa múmkindik alyp otyr. Eń bastysy, Óskemende daıyndalǵan tehnologııalyq ónimderdiń sapasy sheteldik buıymdardan esh kem emes.
«Sılýmın-vostok» zaýytynyń irgesi 1996 jyly qalanǵan. Alǵashynda munda bar bolǵany 11 adam jumys istese, búginde kásiporyn 240 adamdy turaqty jumyspen qamtyp otyr. «Qazirgi tańda memleket qoldaýynyń arqasynda zaýytymyz qarqyndy jumys istep tur. Túrli ınjenerlik jumystarmen aınalysatyn bizdiń zaýyt úshin mundaı qoldaýlar taptyrmaıtyn múmkindik. Sonyń arqasynda búginde jobalaý kezeńinen bastap kez kelgen kúrdeli nysandardy salýǵa jáne ǵımarattardy avtomattandyrýǵa múmkindik aldyq», - deıdi «Sılýmın-vostok» JShS-nyń damý jónindegi dırektory Zoıa Novolodskaıa.
Sonymen qatar, sapar barysynda «Nur Otan» partııasy Tóraǵasynyń birinshi orynbasary oblys ortalyǵyndaǵy etnografııalyq keshende Shyǵys Qazaqstan oblysyndaǵy Qazaqstan halqy Assambleıasynyń ókilderimen kezdesti. Atalǵan keshende elimizde turatyn túrli ult ókilderiniń 17 úı-jaıy ornalasqan. Kezdesýde negizinen Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy tyń bastamalar jaıy sóz boldy.
Al «Nur Otan» partııasynyń oblystyq aktıvimen kezdesýinde Muhtar Qul-Muhammed Elbasy, partııa Tóraǵasy Nursultan Ábishuly Nazarbaevtyń barlyq bastamasyn ár shyǵysqazaqstandyqqa jetkizip, túsindirýdiń mańyzy zor ekenine erekshe nazar aýdardy. Soǵan oraı naqty tapsyrmalar berip, osy jolda partııanyń ár qyzmetkeri aıanbaı eńbek etýi kerektigin aıtty.
