Óskemenniń jańa ákimi bir aıda tyndyrǵan sharýalaryn baıandady
ÓSKEMEN. QazAqparat - Osydan bir aı buryn Óskemen qalasynyń ákimi bolyp taǵaıyndalǵan Jaqsylyq Omar Feısbýktegi paraqshasyndaatalmysh laýazymǵa kelgeli shaharda qandaı sharýalar atqarylǵanyn baıandady, dep habarlaıdy QazAqparat tilshisi.
«Ór Altaıdyń ortalyǵy - Óskemen qalasyna ákim bolyp taǵaıyndalǵanyma búgin týra bir aı boldy. Ádette jańa qyzmetke kiriskende oń-soldy tanyp, tanysýǵa biraz ýaqyt jumsalatyn. Biraq, taıap qalǵan qys, aıaqtalýy tıis joldy jóndeý jumystary mundaıǵa mursha bermedi. Oǵan qosa, biraz jyl ózim turyp kelgen Óskemenniń tirshiligi men úshin bóten emes», - dep jazady Jaqsylyq Omar.
Qala ákiminiń jazýynsha, eń aldymen shahardy qysqa daıyndaý jumystary pysyqtalǵan.
«Qalany jylytýǵa jaýapty kásiporyndardyń, basqa da kommýnaldyq uıymdardyń jumysyn tekserip, qarqynyn arttyrdyq. Jylytý maýsymyna daıyndyq josparly túrde júrgizilýde. Qala úshin bıylǵy jyldyń ózekti máselesi - jóndeýi sozylyp ketken, qoparylyp jatqan kósheler. Sondyqtan, bul suraq erekshe baqylaýǵa alyndy. Kúndelikti nysandardy aralaýdyń nátıjesinde jumys ilgeriledi. Atap aıtar bolsaq, búgin Krylov kóshesi arqyly ótetin Úlbi ózenindegi kópir ashyldy. Jaqyn kúnderi Astana kóshesi ashylady», - deıdi ol.
Jaqsylyq Omardyń jazýynsha, qalanyń sánin buzatyn, zańsyz ornatylǵan dúńgirshekterdi alǵyzý boıynsha da jumys kúsheıtilgen. Arnaıy komıssııa anyqtaǵan 200 dúńgirshektiń 14-i alynyp tastalǵan.
«Jalpy, Óskemenniń jergilikti atqarýshy organdary qala turǵyndarynyń belsendi túrde aralasýymen shaharymyzda ómir súrý sapasyn arttyrýǵa baǵyttalǵan jumystardy kúndelikti atqarýda. Jumyla istegen jumystyń nátıjesi oń bolary anyq», - deıdi ákim.
